KNAPK GE-lu raajat pillugit Naalakkersuisunut akerliliisut
Aalisartut piniartullu kattuffiat, KNAPK, Sulisitsisullu peqatigiiffiat, GE, Naalakkersuisut raajartarsiissutinut allannguiniarnerannut iluarinninnatik ataatsimoorussamik nalunaaruteqarput. Raajarniarnermi nalornisoqalissaaq, Sulisitsisut peqatigiiffiata siulersuisuini siulittaasoq, Henrik Leth isumaqarpoq.
- Aalisarnermut aningaasaliinermut tamarmut allannguissaaq, sulilu isumaliuutigineqarsimasorinngisarpassuakka allanngortinneqassallutik. Tamannalu pillugu ikiuerusuttorujussuuvugut, Henrik Leth oqarpoq.
Sinerissap qanittuani aalisartut amerlanernik pissasut
Raajartassiissutit 57 procentii avataasiortunut, sinnerilu 43 procentii sinerissap qanittuani aalisartunut maanna agguaanneqartarput.
Taakkuali amerlaqatigiinngorlugit agguaanneqartalernissaat Naalakkersuisut kissaatigaat, tamannalu KNAPK-p GE-llu ajuusaarutigaat.
- Raajartassiissutit Kalaallit Nunaannut pissarsiaqaataanerusumit illuarniarneqarput, Henrik Leth oqarpoq.
AAMMA ATUARUK Nunatta karsia sinneqartooruteqarpoq
Tassalu avataasiorluni raajarniarneq nunatsinnut isertitaqaataanerummat allannguisoqassappat nunatta karsianut annaasaqaataanissaa, GE-p siulersuisuini siulittaasup aarleqqutigaa.
- Taama allannguinerup iluaqutissartai ajoqutissartaalu suunersut paasiniarlugit kisitseqqissaartoqartariaqarlunilu misissueqqissaartoqartariaqarpoq, tamakkualu inerneri aallaavigalugit aalajangiisoqartariaqarluni. Suliami misigissutsit kisimik aallaavigineqarsinnaanngillat, Henrik Leth oqarpoq.
Raajartassiissutinik nutaamik agguaaneq nalornisitsissasoq
Raajartassiissutinik avataasiortunit sinerissap qanittuanut aalisartunut nutaamik agguaassiniarnerup saniatigut maanna raajartassiissutinik utertitsinissaq Naalakkersuisut kissaatigaat.
Tamannali aalisakkanik nioqqutissiornermi nalornisitsissasoq, KNAPK Sulisitsisullu peqatigiiffiat isumaqarput.
- Raajartassiissutit ullumi nalornissutigineqanngillat. Qanoq raajaqartiginera taamaallaat nalornissutigineqarpoq. Politikkikkulli maanna nalornisitsisoqalermat raajarniarnermi nalornisoqalerpoq, Henrik Leth oqarpoq.
AAMMA ATUARUK GE-p SIK-llu pisassiissutit sorsuutigigaat
Taannalu Naalakkersuisunut kaammattuuteqarpoq.
- Allannguiniaraanni eqqarsaqqissaartoqaqqaartariaqarpoq, maannalu atuuttunit silatusaartumik qinigassaasariaqarluni. Aserorneqarsimanngitsunik allannguisoqartariaqanngilaq, Sulisitsisut Peqatigiiffiata siulersuisuini siulittaasoq, Henrik Leth, oqarpoq.
