KNAPK Aningaasanut Inatsisissamut siunnersuut pakatsissutigaa
- Aningaasanut Inatsisissatut siunnersuut aalisartunut pitsaanngeqaaq tupannarluinnarlunilu. Sineriassuatsinnilu tamani aalisartut piniartullu ilinniartseqqittarnissaannik pikkorissarteqqittarnissaannillu pisariaqartitsineq eqqarsaatigineqarsimanani, Aalisartut Piniartullu kaffuffissuat, KNAPK tusagassiuutinut nalunaarumminni aggustip 14-anni taama allapput.
Aamma atuaruk AIS 2016 Aalisartut amerliartornerat kingunerlutsitsissaaq
- Siunnersuut takusaq tupannarluinnarpoq, tassami maanna Naalakkersuisooqatigiit qineqqusaarnerup nalaani, aalisartunut pitsaanerusumik sullissinissamik oqariartuutitik qimallugit maanna aallartikkaluttuarput ilaatigut ilinniartseqqittarnissamik pikkorissarteqqittarnissamillu neriorsuutitik qimallugit, KNAPK allappoq imalu nangillutik.
Aamma atuaruk Aalisarneq kisimi isumalluutaassanngilaq
- Aalisartunut qaammarsaanermi sulineq aningaasalissutitigut millisaaffigineqaannarani aammali KNAPK-p pisortallu sullissinissamik isumaqatigiissutaat atorunnaarsillugu, siunnersuisarneq pisortat allaffissuannut, tassa Namminersorlutik Oqartussat allaffissuannut, nuunneqartussatut innersuussutigineqarpoq. Tamannalu ilumoorsinnaanngilaq. Tassami oqartussat allaffeqarfissuannut saaffiginnilluni ataatsimeeqateqarniaraanni aatsaat piffissamik inniminneeqqaarluni tamanna pisalersussaammat, KNAPK-p siulittaasua, Henrik Sandgreen allappoq.
Naalakkersuisut Aningaasanut Inatsisissatut siunnersuutaat, Inatsisartut ukiakkut ataatsimiinneranni, septembarip qeqqata missaani aallartittussami, politikerinit aalajangiiffigineqartussaavoq.
Aamma atuaruk Anda sakkortuunik aalajangiisarniarpoq
Aalisartut piniartullu ilinniarteqqittarnissaannut pikkorissarteqqittarnissaannullu aningaasaliissutit 1,3 millioner koruuninik annikillisinniarneqartut, KNAPK-p siulittaasua isumaqarpoq.
- Tamanna ajorluinnarpoq, killormoortuanik aningaasaliissutit amerlineqartariaqaraluarput aamma allaffiit siunnersorteqarfiit minnerpaamik marlunnik ilasariaqaraluarlutik aappaa Nunatta avannaani aappaalu Kujataani, Henrik Sandgreen allappoq imalu nangilluni:
- Kattuffimmiit neriuppugut, Naalakkersuisut KNAPK tusaaniarlugu piffissami aggersumi pissusilersussasut. Kattuffimmiillu nalunaarutigissavarput oqaloqatigiinnissamut piareersimagatta, KNAPK-p siulittaasua, Henrik Sandgreen naggasiivoq.
