- naatsorsuutiginngilara aalisartunut akit aammalu aningaasarsiornerup apparneranik kinguneqassasoq, Karl Kristian Kruse KNR-mut oqarpoq.Assi: Nauja Møller/KNR

AIS 2016 Aalisartut amerliartornerat kingunerlutsitsissaaq

Aalisarnermut akuersissutaatillit amerlavallaarput, taamaattumik aalisarnerup akilersinnaassusaanut inuiaqatigiinnullu iluanaarutaasinnaaneranut ajortumik kinguneqassasoq, 2016-imut aningaasanut inatsisissatut siunnersuummi allassimavoq. Pissutsillu piviusut allaasut aalisarnermut naalakkersuisup oqaatigaa.

Sinerissap qanittuani aalisarnissamut akuersissuteqartut amerliartornerat ilutigalugu sinerissap qanittuani aalisarnerup akilersinnaassusia annikilliartussaaq inuiaqatigiinnullu iluanaarutaasinnaanera ajortumik kinguneqassalluni, tamanna 2016-imut aningaasanut inatsisissatut siunnersuummi oqaaseqaatini nalinginnaasuni aalisarneq pillugu nassuiaatigineqartuni allassimavoq.

Taamaakkaluartoq Aalisarnermut Naalakkersuisup Karl-Kristian Krusep taama inerniliisoqarnera ilisarinngilaa.

Sinerissap qanittuani aalisartut 2013-imi 2.200-sut ukiormanna 27 procentinik amerleriarsimapput, tassa 2800-nngorlutik. Aappaagumullu amerleriaqqinnissaat aamma ilimagineqarpoq.

Tamanna saarullinniarnerup qaleralinniarnerullu akilersinnaassusianut inuiaqatigiillu iluanaarutissaannut ajortumik kinguneqarnissaa, 2016-imut aningaasanut inatsisissatut siunnersuummi oqaaseqaatini nalinginnaasuni allassimavoq.

Naak aalisarnermut naalakkersuisup suliassaqarfianut tunngassuteqaraluartoq, Aalisarnermut Naalakkersuisup Karl-Kristian Krusep tamanna ilisarinnginnerarpaa:

- Tassa taamatut aningaasanut inatsisip saqqummiunneqarnerani missingiummi allassimasoqarnera uannut ilisarnartuunngitsoq oqaatigisariaqarpara. Pissutigalugu aalisagartassanik qaffaanerit pinikuupput taamaattorli aamma Kalaallit Nunaanni tunisassiornermi ingerlataqartut piginnaasaat annertusiartornikuupput ukiuni kingullerni. Aamma aalisartut tunisassiorfinnut tunisisarnerminni akit pitsaanerusut tikikkiartugaat eqqarsaatigalugit, naatsorsuutiginngilara aalisartunut akit aammalu aningaasarsiornerup apparneranik kinguneqassasoq, Karl-Kristian Kruse KNR-mut oqarpoq.

Taamaattumik 2016-imut aningaasanut inatsisissatut siunnersuummi allassimasut eqquutissasorinngilai.

- Aalisagaq nunatsinni nalitunerusunngorluni nunatsinnilu suliarineqarlunilu tunisassiarineqarnissaalu politikkeqarnerput aallaavigissagaanni isumaqarpunga taamatut kinguneqarnissaa siulittuutigissallugu eqqunngitsoq, Karl-Kristian Kruse oqarpoq, ilimagaalu 2016-imut aningaasanut inatsisissami siunnersuummit allaanerusumik allaqqasoqalissasoq:

- Oqallinnissamut tunngavissiaavoq. Aamma oqallinnermi qularutiginngilara piviusut allassimalernerannik kinguneqartumik politikerit oqallikkumaartut, Piniarnermut, aalisarnermut nunalerinermullu Naalakkersuisoq, Karl-Kristian Kruse oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat