Anda sakkortuunik aalajangiisarniarpoq

Nunatta aningaasarsiornera appariartorpoq aningaasartuutillu amerliartorlutik. Tamanna aappaagumut Aningaasanut Inatsisissatut siunnersuutip ippassaq saqqummiunneqarnerani erserpoq.
Assi © : Jonas Fievé/KNR
aggustip 12-at 2015 05:11

Nunatta aningaasarliornera Aningaasaqarnermut Naalakkersuisup Andreas Uldumip isertuutinngilaa, oqarluni aningaasaqarnitta ilorraap tungaanut saatinneqarnissaa eqqarsaatigalugu sakkortuumik qanoq iliuuseqartoqarluni aalajangiisoqartariaqartoq.

Aningaasaqarnermut Naalakkersuisup aamma erseqqissarpaa, Aningaasanut inatsit eqqarsaatigalugu isumaqatigiinniarnerit pingaaruteqartut avaqqunneqarsinnaanngimmata.

Ilaatigut akitsuusiinerit arlaqartut katillugit 100 millionit koruuninik isertitsissutaasinnaasut saqqummiunneqareerpata isumaqatigiinniutigineqartussat.

Aamma atuaruk Sinneqartoorutit amigartoorutinngorput

Akitsuusiinermik isumap saniatigut aaqqissuusseqqinnerit arlaqartut sukimiisumik misissoqqissaarneqartussat ilaatigut tassaapput utoqqalinersiutit siusinaartumillu suliunnaarnersiutit.

Aningaasaqarnermut Naalakkersuisoq Andreas Uldum tamanna pillugu ima oqarpoq:

- Aaqqissuusseqqinnerit assigiinngitsut massakkut pisussat ilaatigut tassapput siusinaartumik suliunnaarnermut utoqqalinersiuteqarnermullu tunngasut. Aamma akileraartarnermut ineqarnermullu tunngasut aaqqissuusseqqinnerit pisussaallutik.

- Tamakkulu tamarmik siullermik aningaaartuutaariarlutik kingorna aningaasanik isaatitsissutaalersussaapput, Aningaasaqarnermut Naalakkersuisoq, Andreas Uldum taama oqarpoq.