Aningaasanut inatsit: Sinneqartoorutit amigartoorutinngorput
Maajimi Naalakkersuisut pilersaarutaat 11 millionit koruuninik sinneqartoornissamik imaqarput.
Ullumili Aningaasaqarnermut Naalakkersuisup Anda Uldumip siunnersuummi saqqummiussaani sinneqartoornissamik pilersaarutaagaluaq 65 millionit koruuninik amigartooruteqarnissamik imaqalersimavoq.
2017-imullu pilersaarut pitsaanerunngilaq.
Pilersaagutaagaluarpormi 2017-imi 28 millionit koruuninik amigartoornissaq maannali pilersaarut allanngorpoq 63 millionit koruuninik 2017-imi amigartoortussanngorlugu.
Aatsaat 2018-imi 2019-imilu Anda Uldumip sinneqartoornissaq neriuutigaa.
Ukiunili taakkunani sinneqartoorneq 2015-imiit 2017-imut amigartoorutit matussusernavianngilaat.
Allatut oqaatigalugu: Maanna Naalakkersuisuusut ukiut sisamat naalakkersuisooreerunik malitsissaminnut ataatsimut isigalugu amigartoorutinik tunniussissapput.
