Aqqaluk Lynge: Nunatta ataatsimeersuarnermi ilaannginnera isornarpoq
![](/sites/default/files/styles/image_934x467/public/article_images/aqqaluk_lynge_0_0_0.jpg?itok=_QwWGgtn)
Novembarip 17-iani 2017 nutarterneqarpoq: Aqqaluk Lynge ICC-mi siornatigut præsidentiusimavoq. Naalagaaffiilli Peqatigiit Silap pissusia pillugu Bonnimi ataatsimeersuartitsinerannut nammineerluni peqataavoq ICC-lu sinnerlugu oqaaseqarani.
Tysklandimi illoqarfissuarmi Bonnimi Naalagaaffiit Peqatigiit silap allanngoriartornera pillugu COP23-imi nunat 196-it peqataaffigisaannik ataatsimeersuartitsivoq - Namminersorlutilli Oqartussat peqataatitaqanngillat.
Namminiilivinnermut Nunanut allanut Nunalerinermullu Naalakkersuisoqarfik tamatumunnga uppernarsaavoq. Tassani tulleriiaarinerminni ukioq manna iluatsissinnaasimanagu nalunaarlutik.
AAMMA ATUARUK Silap pissusia pillugu ataatsimeersuarneq Bonnimi ataasinngornermi aallartippoq
Tulleriiaarineq ICC-p siulittaasorisimasaata Aqqaluk Lyngep isornartorsiorpaa. Tannalu COP23-imi aaqqissuisunit paasisimasallit oqallinnissaannut qaaqqusaasimasoq Naalakkersuisut ataatsimersuarnermi peqataannginerannut ajuusaaqaaq:
- Pisariaqarluinnarpoq. Piorsaaneq, aamma klimamut allannguutaasunut akiuunniarnissarput eqqarsaatigalugu avataaninngaanniit tapersersorluarneqarnissaq amigaataalluinnarpoq. Taamaattumik klimamut tunngasumik annertunermik naalakkersuisut iliuuseqartariaqarput, Aqqaluk Lynge oqarpoq.
Lyngep nunat 200-ngajaat sinniisaasa Bonnimiinnerannut Naalakkersuisunut ilaasortat sisamat Kinameeqqammernerat sanilliukkaanni amerlagai:
- Maani naalakkersuisorpassuit, inuiappassuit, nunat 200-ngajaat peqataanerannut maani saqqummiisuugutta qanorli kiinarput immaqa pitsannguallatsigissagaluarpa, Aqqaluk Lynge taama oqarpoq.
Parisimi isumaqatigiissut
Parisimi isumaqatigiissummi 2015-imeersumi aningaasaqarneq Bonnimi ataatsimeersuarnermi suliassat pingaarnerit ilagaat.
Kalaallit Nunaalli isumaqatigiissummut ilaanngilaq. Naalakkersuisut naapertorlugit CO2-mik aniatsitsinermi killilersuinermi Kalaallit Nunaata aningaasarsiornikkut suliffissuaqarnikkullu ineriartorneranut kigaaqutaasinnaanera pissutigalugu.
AAMMA ATUARUK Vittus: Silap pissusia pillugu isumaqatigiissut Nunatsinnut pitsaasuunngilaq
Taamatulli nalunaajaaneq Aqqaluk Lyngep akuerinngilaa. Taannami isumaqarpoq silap pissusaata allanngoriartorneranut Kalaallit Nunaat naleqqussarnerusariaqarnerujussuusoq.
- Ullumikkut tassa klima pillugu immikkut ilisimatusarfeqaraluarpugut. Taannatuaavoq, kisiannili atorfillit aammalu allaffimmiut eqqarsaatigalugit tassuuna nukittorsaaneq immaqa immikkut klima pillugu naalakkersuisoqarfimmik pilersitsigaanni immaqa iluaqutaasinnaassagaluartutut uanga isigaara, Aqqaluk Lynge oqarpoq.
Naak isornartorsioraluarlugit Aqqaluk Lyngep erseqqissaatigaa Naalakkersuisut COP23-mut Parisimiluunniit isumaqatigiissummut peqataannginneri pillugit nunat assigiinngitsut akornanni, soorlu Bonnimi ataatsimiinnerni isornartorsiorunnarnagit.
Naalakkersuisut siulittaasuat Kim Kielsen isornartorsiuineq pillugu oqaaseqartissinnaasimanngilarput.
AAMMA ATUARUK WWF: Nunarput silap pissusaa pillugu nalunaarummik nassitsisimasariaqaraluarpoq