WWF-ip isumaa naapertorlugu Kalaallit Nunaata nammineerluni anguniagassani Naalaagaffiit Peqatigiinnut nalunaarutigisimasariaqarluarpai, John Norbo WWF-imi silap pissusaa aamma avatangiisit pillugit pisortaq oqarpoq. Assi: WWF

WWF: Nunarput silap pissusaa pillugu nalunaarummik nassitsisimasariaqaraluarpoq

Nunarput silap pissusaa pillugu Parisimi isumaqatigiissummut peqataanngitsoq Naalakkersuisut sapaatip akunnerani kingullermi nalunaarutigaat tamannalu Pinngortitaq pillugu nunarsuaq tamakkerlugu suliniaqatigiiffimmit WWF-imit pakatsissutigineqartupilussuuvoq.

- Pakatseqqaqaagut. Silap pissusaataa allanngoriartornera nunarsuarmut tamarmut sunniuteqarmat, ingammik issittumi, ukiuni makkuanni kianneruleriartuinnarfiusumi.

John Nordbo, pinngortitaq pillugu nunarsuaq tamakkerlugu suliniaqatigiiffimmi WWFimmi silap pissusaa aamma avatanngiisit pillugit pisortaasoq, taama oqarpoq. Kalaallit Nunaat silap pissussaa pillugu Parisimi isumaqatigiissummut peqataassagaluarpat, tamanna kalaallit nunaannut akisuallaassasoq Naalakkersuisut isumaqarput, tamannalu John Nordbop isumaqatiginngilaa.

Taama oqartoqarneq Naalakkersuisut isumaqatiginngilaat, Naalakkersuisoq Vittus Qujaukitsoq mail-ikkut KNR-imut nassiussilluni erseqqissaavoq,  silap kianneruleriartuutaanik millisaanissamik isumaqatigiissummi danskit neriorusuutaannut Kalaallit Nunaat pituttugaasoq.

WWF-ip isumaa naapertorlugu Kalaallit Nunaata nammineerluni anguniagassani Naalaagaffiit Peqatigiinnut nalunaarutigisimasariaqarluarpai,  anguniagassat Kalaallit Nunaanni unammilligassanut naleqqussarlugit taamaakkaluartorlu Parisimi isumaqatigiissutigineqartut naammassineqarlutik.

Avatangiisit pillugit inatsisinut proffesorip Ellen Margrethe Bassep aalajangiusimalluinnarlugu oqarpoq, danskit CO2-mik annikillissaanissamik nalunaarutaanut kalaallit Nunaat inatsisitigut pituttugaasoq, apeqqutaaginnartorli Danmark aamma Naalagaaffiit Peqatigiit taama aaqqiineq akuerissaneraat, tassani Kalaallit Nunaat silap pissussaa pillugu pilersaarusiorsinnaanera Kalaallit Nunaannit Danmarkimilluunniit erseqqisaatigineqarluni, Ellen Margrethe Basse oqarpoq.

- Ajunngisaartoqarnersoq apeqqutaavoq. Takorlooriassagit, Amerikami naalaagaffiit tamarmik immikkut aamma tysklandimi naalagaaffiit immikkoortui tamarmik immikkut silap pissussaanut pilersaarummik saqqumiussigaluarpata, tamakkua aqunneqarsinnaappat? Ellen Margrethe Basse aperivoq.

Taanna isumaqarpoq, Kalaallit Nunaata silap pissussaa pillugu isumaqatigiissummut peqataatinneqarnissaa Nalaagaaffiit peqatigiinnit soqutigineqarsinnaasoq Kalaallit Nunaat malussarissutut isigalugu.

Tamannali danskit naalakkersuisuinik oqaloqateqartoqarnissamik  piumasaqaatitaqassaaq, Kalaalllit Nunaat nunat tamat isumaqatigiissutaannut peqaatinneqarsinnaanera killeqarmat-

- Kalaallit Nunaat namminerluinnaq sassarsimmaavoq, aatsaat apeqqutini Danmarkimut pingaaruteqanngitsuni, Ellen Margrethe Basse, Aarhusip Universitetani avatangiisit pillugit professori  oqarpoq.  

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat