Kinguaattoorneq: Inuiattut ullorsiornissatsinnut akiuussuserneqarnissarput angumerisinnaanngilarput

Akiuussutissamik neqeroorfigineqartussat tamarmik aatsaat juulimi aggustimiluunniit neqeroorfigineqassasut, nakorsaaneq, Henrik L. Hansen oqarpoq.
- Ippernarpassuaqalernerani pissaaq. Juulimi aggustimiluunniit akiuussutissamik neqeroorfigineqartussat tamakkersimanissaat naatsorsuutigaarput, Henrik L. Hansen oqarpoq. Assi © : KNR / Malik Brøns
Allattoq Christine Hyldal
marsip 31-at 2021 17:17

Suna tamarmi naatsorsuutigisatut ingerlaguni coronamut akiuussuserneqarnissamut neqeroorfigineqartussat tamarmik juunip ulluisa 21-anni neqeroorfigineqarsimassapput.

Nakorsaaneq, Henrik L. Hansen februaarimi oqarpoq.

Naatsorsuutigisatulli pisoqanngilaq, neqeroorfigineqartussat tamarmik juulimi aggustimiluunniit neqeroorfigineqarsimanissaat maanna naatsorsuutaalerpoq.

- Ippernarpassuaqalernerani pissaaq. Juulimi aggustimiluunniit akiuussutissamik neqeroorfigineqartussat tamakkersimanissaat naatsorsuutigaarput, Henrik L. Hansen oqarpoq.

Nunatsinni innuttaasut 4460-it akiuussutissamik siullermeertumik kapitereerput. Taakkunannga 4244-t aappassaaneerlutik kapitereerlutik – taakkulu tassaallutik innuttaasut 7,5 procentii.

AAMMA ATUARUK Killilersuinerit sivitsorneqarput: Nunatsinnut killeqarfiit maajip ulluisa aappaannut matoqqassasut

Nunarsuaq tamakkerlugu akiuussutissanik pissarsiniartoqangaatsiarnera tamatumani pissutaavoq.

Danmarkip akiuussutissanik 100-nik pissarsinerani nunarput ataatsimik pissarsiaqartarpoq - taamaammat akiuussutissanik nunatsinnut tikittoqarnissaanut Danmarkimut tunniussaqartoqarnissaa apeqqutaalluinnarluni. Danmarkillu akiuussutissat naatsorsuutigineqartunit ikinnerusut pissarsiarinikuuai.

- Annertunerusumik pissarsisinnaanissarput naatsorsuutigisinnaanatigu nalunngilarput. Aamma AstraZenecamit akiuussutissalersuisoqaqqilissanersoq aamma naluarput, nakorsaaneq, Henrik L. Hansen oqarpoq.

Astrazenecameersumik Danmarkimi kapuineq uninngagallartoq

Danmarkimi akiuussutissamik AstraZenecameersumik kapuineq akiuussutissamik pissarsisimasut ilaanni taqqatigut milittoortoqarnerata kingunerisaanik unitsinneqarallarpoq.

Danmarkimi arnaq 60-inik ukiulik akiuussutissamik AstraZenecameersumik kapitereernermigut taqqatigut milittoorluni toquvoq.

Akiuussutissap napparsimalernerullu akornanni ataqatigiittoqarnera uppernarsarneqanngilaq. Tamanna nunat qassiiusut Danmark ilanngullugu misissuleruttorpaat.

AstraZeneca nunatsinni atorneqarnikuunngilaq – taamaallaat Pfizer/BioNtechimeersoq kapuinermi atorneqarluni.

- Nunatsinni inunni tassanngaannartumik kinguneqartoqaratarsinnaanera aarlerinartorsiortikkusunngilarput, Henrik L. Hansen oqarpoq.

80 procentit kapitereersut

Nakorsaanerup oqarnera naapertorlugu innuttaasut 35 procentii sumiiffimmi suli akiuussutissersuilerfiusimanngitsuni najugaqarput.

Tamatuma saniatigut Danmarkimi coronamik tunillatsissimasut 95 procentii Tuluit Nunaanni allanngorsimasumit, tassa tunillaassuunnerusumik tunillatsissimapput.

Modernamit akiuussutissaq poorskip kingorna sapaatip akunnerata qaangiunnerani tikissaaq - tassanilu kapuutip imassai 2400-t tikissallutik. Taakku tamarmik nunatta kujataani atorneqassapput.

Nunatsinni illoqarfinni tikerarfiunerpaani 65-ileereersimasut tamarmik akiuussutissamik kapitinnissamik neqeroorfigineqarnikuupput. Taakkunannga 80 procentit kapitinnissamut akuersillutik.

- Tamannalu ilorrisimaarnarpoq, nakorsaaneq oqarpoq.

Nittartagaq akiuussutissalersuinermut pilersaarutip killiffianut tunngasoq saqqummertussaavoq.