Kinguaassiutitigut naapertuilluanngitsuliornerit ikinnerusut – hashillu arsaarinnissutaasut annikinnerusut
Kalaallit Nunaanni Politiit siorna pinerluuteqarsimasunik ukiumoortumik naatsorsueqqissaarnertik saqqummiuteqqammerpaat. Sulianilu annertuuni marlunni appariartoqarsimavoq: Tassa hashimik arsaarinnissuteqarneq aamma kinguaassiutitigut pinerluuteqarnerit.
Kinguaassiutitigut pinerluuteqarnerit 587-it Kalaallit Nunaanni Politiinut siorna nalunaarutigineqarput.
Nalunaarutiginninnerit ukiuni sisamani aatsaat taama ikitsigipput.
Kinguaassiutitigut pinerluuteqarnerit tassaapput assersuutigalugu pinngitsaaliilluni atoqatiginninneq aamma kannguttaalliorfigisaaneq. Meeqqanut kinguaassiutitigut naapertuilluanngitsuliornerit pillugit nalunaarutiginninnerit aamma ikinnerupput.
Tamanna pitsaasuusoq, politiit pisortaat, Bjørn Tegner Bay oqarpoq, kisitsisilli suli annilaarnartuupput:
- Kalaallit Nunaanni Politiit kinguaassiutitigut pinerluuteqarnerit pillugit sulianik suli ukkatarinningaatsiassapput, politeeqarfinni allanit kisitsisit sanilliukkutsigit suli suliassaqangaatsiarpugut, taanna kisitsisit naalagaaffeqatigiinni politiinit allanit 6,4-riaatip missaanik qaffasinnerunerannut innersuussilluni oqarpoq.
Hashi skunkillu annikinnerusut
Taavalu hashi iioraanikkut, nassataniitsitsinikkut, højtaleriniitsitsinikkut aamma eqqussuinermi tunuliaqutaasut isumassarsiaqarnerisigut nunatsinnut anngiortumik eqqunneqarsimasoq.
2022-mi hashi 129,68 kiilu nunatsinni arsaarinnissutigineqarpoq. Kisitsit taanna siorna 61,95 kiilumut apparpoq. Tassa 70 kiilup missangajaanik appariarluni.
62 kiilu siorna arsaarinnissutigineqartoq 2020-mi coronamik tuniluuttoqarnerani timmisartullu nunamiiginnarneraniilli aatsaat taama annikitsigivoq. Ukiumi tassani 26,77 kiiluinnaq arsaarinnissutigineqarpoq.
Tupaallannanngitsumillu Kangerlussuaq nunatsinni hashimik skunkimillu arsaarinnissuteqarfiunerpaavoq: Tassani 43,5 kiilu siorna arsaarinnissutigineqarpoq.
Ikiaroornartunut tunngatillugu inatsisinik unioqqutitsineq
Taarsiullugu ikiaroornartunut tunngatillugu inatsisinik unioqqutitsinerit amerlanerungaatsiarput.
2022-mi kisitsit taanna 584-iuvoq, ukiunilu 20-nit amerlanerusunit aatsaat taama amerlatigillutik. Politiit siorna 582-inik nalunaaruteqarfigineqarput, ukiullu siulianut sanilliullugu marluinnarnik ikinnerullutik. Taamaammat kisitsit suli qaffasippoq. Tassanilu akitsuuserisunit politiiniillu ikiaroornartunik pinerluuteqarnermik ukkataqarneruneq nassuaatip ilagisinnaavaa.
- Tamatumalu saniatigut nakuusernermik kinguaassiutitigullu pinerluuteqarnermik kinguneqartitsisartoq tassa imigassamik atornerluineq inuiaqatigiinni qitiusumik suli ajornartorsiutaavoq, politiit pisortaat oqarpoq.
