Kinap nunani G7-meersuniit isornartorsiorneqarnini assuarigaa
Nunat G7-imi siuttut Kinami aqutsisunut sakkortuunik isornartorsiunerat, Kinamit assuarineqarpoq.
G7-imi nunat ilaasortat, Kinamut isornartorsiunerat nunami namminermi pissutsinut sakkortuumik akuliunnertut, Kinami aqutsisunit taaneqarpoq, G7-imilu nunat ilaasortat, Kinamut mamarliinertik unitsissagaat kaammattuutigineqarluni.
Nunat G7-imi ilaasortat sapaatit akunnerata naanerni ataatsimeersuarnerminni, Kinami nunap immikkoortuani Xinjiangimi inuit pisinnaatitaaffiinik innimiilliortoqartarneranik isornartorsiuteqarput.
AAMMA ATUARUK USAp Hongkongimi aallartitaa: Hongkongimi pinngitsaalisaasutut misigisimaneq
Inuit pisinnaatitaaffiinik suliaqartut aamma takunnittut arlaannannullu attuumassuteqanngitsut oqarnerat naapertorlugu naggueqatigiit Uighurit musliimiusut naqisimaneqartorujussuupput.
Naalagaaffiit Peqatigiit aamma inuit pisinnaatitaaffiinik suliniuteqartut oqarnerat naapertorlugu naggueqatigiit ikinnerussuteqartut, Uighurit 1 millionit tungaannut amerlassuseqartut aalajangersimasumik eqqarsartariaaseqalernissaat siunertaralugu parnaarussaaqqapput. Tamanna inunnik ikinnerussuteqartunik toqoraanertut USA-mit taaneqarpoq.