Donald Trump qinersisartut ataatsimiisinneqarneranni annikitsumik siutimigut eqqorneqarluni aallaaneqartoq

Amerikamiut præsidenterisimasaat Donald Trump naalagaaffimmi Pennsylvaniami qineqqusaarluni oqalugiarnermini annikitsumik siutimigut eqqorneqarluni aallaaneqarpoq.

Qinersisartunik ataatsimiititsinerup aallartilaarnerani Trump oqaluttarfimmiitilluni siutimigut talerperlikkut eqqorneqarnermi kingorna siutini assamminik attoreeramiuk oqaluttarfiup tunuanut aquippoq.

Angut aallaannittutut pasineqartoq taanna politiinit ilisimaneqanngitsoq Trumpip tungaanut igippoq siutaatigullu qarsupittumik eqqorlugu.

Tamatuma kingorna Donald Trump qineqqusaarluni ataatsimiittarfimmit qimagutsinneqarpoq nakorsiartarfimmullu qanittumiittumut paassutsikkiartorluni.

Trumpimut aallaannittutut pasineqartoq amerikamiut politiivisa isortortumik paasiniaasartuinit FBI-mit aallaaneqarluni toqunneqarpoq. Trumpimut aallaannittutut pasineqartoq angutaavoq 20-nik ukiulik Thomas Matthew Crooksimillu ateqartoq FBI-mit kingorna uppernarsarneqarpoq.

Qinersisartut ataatsimiisinneqarneranni tusarnaariat ilaat ataaseq allaasersortoqarnerani toqutaavoq allallu marluk ikiligaallutik.

Donald Trump aallaasersortoqarnerata kingorna ajunngilaq.

Donald Trump republikanerit ataatsimiinneranni ataasinngorpat pisussami peqataanissaa naatsorsuutigineqarpoq.

Ataatsimiinnermini tassani USA-mi novemberimi præsidentimut qinersisoqarnissaannut partiip pisortatigoortumik qinigassanngortissagaa naatsorsuutigineqarpoq.

Aallaasersortoqarnera nunarsuarmi tamanit qisuariarfigineqarpoq. Taakkununnga ilaavoq danskit ministeriunerat Mette Frederiksen, aallaasersortoqarneralu akuerineqarsinnaanngilluinnartoq oqarluni.