Naalakkersuisoq: - Kinami aallartitaqarfeqalissaaq

Kalaallit Nunaat Bruxellesimi, Washingtonimi Københavnimilu aallartitaqarfeqarput. Ukiaru Islandimi Reykjavikkimi aamma aallartitaqartoqalernissaa piviusunngortinneqassaaq, tamaangali killinngilaq.

Tullinnguuttormi taassaavoq Kina, Nunanut Allanut Naalakkersuisup Vivian Motzfeldtip ICC-mi ataatsimeersuartoqarneranut oqalugiarnermini atatillugu oqarpoq.

AAMMA ATUARUK Nunatsinneersut tuniniagassanik Kinami pilerisaarinerat

- Niueqatigiinnikkut nukittorsarneq suli ingerlateqqikkumallugu siunnerfigivarput Kinami aallartitaqarfeqalernissamik pilersaarut, Vivian Motzfeldt oqarpoq.

Naalakkersuisuni ilaasortat arlallit nunatsinni tunisassiat inuussutissarsiornikkullu soqutigisat pilerisaarutiginiarlugit ukiuni siuliini Kinamiittarput. Asiamullu tunisassiornerup ineriartortinnissaa siunertaralugu Kinami aallartitaqartoqalernissaa maanna pilersaarutigineqarluni.

- Isumaqarpunga uagut nammineq sumiiffimmi niueqatigerusutatsinni nammineq najuunnitsinni angusassavut pitsaanerujussuit anguneqarsinnaasut.

Kunngeqarfik Danmark aqqutigalugu Kalaallit Nunaat aallartitaqarfeqareeraluartoq tamanna naammanngitsoq Vivian Motzfeldt oqarpoq.

- Soorunami Danmarkip aallatitaqarnera atorneqarsinnaavoq, kisianni Danmarkip soqutigisai uagutsinninngaanniit aamma allaanerupput.

AAMMA ATUARUK Nunatsinneersut tuniniagassanik Kinami pilerisaarisut

Taassuma ICC-p Alaskami ataatsimeersuarneranut atatillugu suliniut saqqummiuppaa, naggueqatigiillu inuit aallartitat nunanit pingasuneersut taama periarfissaqanngitsut Vivian Motzfeldt oqarpoq.

- Naggueqatigiit inuit akornanni soorlu ippassaq oqalugiaatinni aamma naggueqatitta tamanna pisinnaatitaaffik piginngilaat, taamaammat taakkununnga aamma usorsisimaarnartorujussuuvoq soorunami uagut pisinnaatitaaffeqaratta nunanut allanut aallartitaqarfimmik pilersitsisinnaassalluta.