IA S-ilu: Kikkut tamarmik nunatsinniissinnaasariaqarput

Qineqqusaartoqartillugu oqallittoqaraangat puffaammertoqarajuppoq, ingammillu oqaatsit inuiaassuserlu oqallisigineqartupilussuusinnaasarput.

Kikkulli tamarmik nunatsinniissinnaasariaqarput, nunaniillu allaneersunut uumissuineq akiorneqartariaqartoq, Inuit Ataqatigiit siulittaasuat, Sara Olsvig, isumaqarpoq.

Tamanna partiit annerit aappaata Siumup isumaqatigaa.

Ilaatigut oqaatsit, inuiaassuseq sumi najugaqarfimmeersuuneq aallaavigalugit aporaattoqartartoq, Inuit Ataqatigiit siulittaasuat Sara Olsvig oqarpoq.

AAMMA ATUARUK Oqaatsit pillugit oqallinnermi attaveqaqatigiinnissaq ujartorneqartoq

- Aporaannerit nakkarsaanerillu qanoq annertutigisarnersut qarasaasiatigut allatigullu oqallittarfiit qivialaaginnaraanni takuneqarsinnaasarpoq.

- Innuttaasut amerlasuut immikkoortitaasutut misigisimallutik uatsinnut tutsaqartarput, Sara Olsvig oqarpoq.

Inuit Ataqatigiillu immikkoortitsineq akiorniarpaat.

AAMMA ATUARUK Kinaassusermut aporaarnerit Nunatsinnit nuutsitsisartut

- Inuit Ataqatigiinni erseqqissumik isumaqarpugut. Tassalu nunarsuarmioqataassaagut, aamma assigiinngisitaarnerput nukittut atorluassavarput. Assigiinngisitaartuuneq nunatsinnut pitsaasuuvoq, nunarpullu tamanut inissaqartitsisuusoq uagut isumaqarpugut, Sara Olsvig oqarpoq.

Nunatsinni partiit annerit aappaannit Siumumit tamanna isumaqatigineqartoq, partiip politikkikkut oqaaseqartartuata, Jess Svanep oqaatigaa.

- Uagut Siumuminngaanniit akuerinngisarput tassaavoq, allamiunik tikilluaqqusinani oqallittoqalissappat. Uagut inuiaqatigiit kikkuugaluarpataluunniit tikilluaqquagut. Soorunami nunatsinnut naleqqussarpata, taanna aamma peqataaffigissavarput, taannalu aamma ingiaqataaffigerusupparput, Jess Svane oqarpoq.

Sara Olsvig naapertorlugu Inuit Ataqatigiit nunanit allaneersunut uumissuinerup qanoq akiorneqarnissaanut pingasunik siunnersuuteqarput.

Siullermik naligiisitsineq nalingiimmillu pisinnaatitaaffeqarneq tunngaviusumik inatsisissami qitiutinneqartariaqartoq, Sara Olsvig isumaqarpoq.

AAMMA ATUARUK Vigtigt at holde fokus på diskrimination

- Taava aappaattut, Inuit Ataqatigiinnit immikkoortitseqqusaannginnermut inatsisiliorusuppugut, aammalu naligiisitsinermut inatsisiliorluta, Inuit Ataqatigiit siulittaasuat oqarpoq.

Taavalu naligiissitaanermut siunnersuisoqatigiit arnat angutillu naligiissitaanissaannut suliaata saniatigut inuiaqatigiit akornanni naligiinnissaq suliassaannut ilanngutissasoq siunnersuutiginiarpaat.

Nunatta matunani ammasuunissaa pingaaruteqartoq Sara Olsvigip Jess Svanellu oqaatigaat.