Oqaatsit pillugit oqallinnermi attaveqaqatigiinnissaq ujartorneqartoq
Kikkut imminnut kalaalivittut taasinnaanersut pillugit aporaannerit Danmarkimut ilinniareerlutik Nunatsinnut utertartut 40 procentiinnaanerannut pissutaaqataapput.
Namminersorlutik Oqartussat paasissutissiissusiaanni tamanna inerniliunneqarpoq.
- Kalaallisut oqalussinnaanngikkaluarluni kalaaliusoqarsinnaavoq. Kinaassuserput taannaavoq. Aanaakkunni aataakkunnilu peroriartorpugut. Tamaani kingoqqisuuvugut. Kalaallisut aaqarpugut. Tarnikkut kalaaliuvugut, kalaaleq danskisut oqaluttoq, Jeanette Holding, oqarpoq.
- Tunniutiinnarnissaq ajornannginneruvoq
Kinaassusermut aporaattoqartarnera Nunatsinneersut Danmarkimi ilinniareerlutik uterneq ajornerannut pissutaaqataasutut Namminersorlutik Oqartussat allaqqitassiaanni inerniliunneqartumut taanna ilisarsisinnaavoq.Kalaallisut oqalussinnaanngitsut tikilluaqqusaanngitsutut misiginngikkunik avataaniitinneqartutut misigisimasarput.
Kalaallisut oqalussinnaanngitsut kalaalivittut ilaannit isigineqarneq ajornerat, tamatumunnga pissutaasoq nalunaarusimami apersuinernit tunngaveqartumi allaqqavoq.
AAMMA ATUARUK Kinaassusermut aporaarnerit Nunatsinnit nuutsitsisartut
- Qajannaalluanngikkaanni tunngaveqanngikkaannilu imaluunniit tapersersorneqanngikkaanni, tarnikkut eqqortittoqartarpoq. Taava tunniutiinnarnissaq ajornannginneruvoq, oqarlunilu nunagisanni akuerineqanngikkuma taava aallaannassaanga, Jeanette Holding oqarpoq.
Suna pissuserissaarnerunersoq pillugu oqallinnissaq kajumissaarutigineqartoq
Kalaallisut oqalunngikkaluarluni kalaallisut misigisoqarsinnaasoq, taanna tassa isumaqarpoq. Oqaatsillu pinngikkaluarlugit kalaallisut kinaassuseq pillugu oqallittoqartariaqartoq, Holding isumaqarpoq.
- Inuit allatut kinaassuseqartut, naammattumillu kalaaliunngitsut oqarfigiunnaarlugit. Kalaaliuvugut. Uummatigut tamaaniipput, Jeanette Holding oqarpoq.
Inuiaqatigiinni ikinnerussuteqartut, soorlu kalaallisut oqalussinnaanngitsut, pillugit oqallinnerni suna pissuserissaarnerunersumut politikerit isummernissaat nalunaarusiami kajumissaarutigineqarpoq.
Pitsaanerusumillu oqalliseriaaseqartoqartariaqartoq, Jeanette Holding isumaqarpoq.
- Oqallinnerit qanoq attaveqaqatigiissinnaanersugut paasiniartariaqarparput, Jeanette Holding oqarpoq.