Aviaaja Storch suliaqarnerminut atatillugu politimesterimit, Bjørn Tegner Bayimit nersornaaserneqarpoq.Assi: Grønlands politi

Kiffartuussinissamut ikiortip angutip inuunera annaakkaa

Kalaallit Nunaata Politiivini vagtcentralimi serviceassistentitut sulisup angut imminut toqunnissamik sioorasaarisoq, aasaq annaappaa.

23-nik ukiullip serviceassistentitup sulisup Aviaaja Storchip angut imminut toqunnissaminik sioorasaarisoq nalunaaquttap akunnerata aappaa avillugu telefonikkut oqaluuppaa. Angutip arlaleriarluni oqaloqatigiinneq kipitittarpaa, taamaakkaluartorli Aviaajap angut attavigisinnaalluarpaa eqqissisarlugulu.

Telefonikkut oqaluunnerminni Aviaajap angut kimigiiserfigalugu sumiinneranik oqartissinnaalersimavaa politiillu, sumiiffianut ornigupput ikiorneqarlunilu.

Aviaajap vagtcentralimi sulinerani anaanaq sianerpoq ernini ernumagalugu, taanna imminut toqukkusummat.

Aviaaja Storchip vagtcentralimi sulinerani politimesterip nersualaarinninnera Aviaajamut nuannerpoq.

Suliat taamatut ittut nalinginnaasumik politiinit suliarineqartarput, politiillu oqarnerat naapertorlugu vagtcentralimi pisortap Aviaaja Storch tatiginartissimavaat, suliassarlu aaqqissinnaasimallugu.

Taamaattorli ataasiakkaanik suleqateqarpugut naatsorsuutiginngisatsinnik, aammalu inuit allat inuunerannut pingaaruteqarluinnartumik, iliuuseqariataarsinnaasunik, politiit taama allapput.

Taamaattumik 23-ni ukiulik serviceassistentip Aviaaja Storchip iliuutsini pillugu politimesterimit tallimanngornermi nersorniarneqarpoq.

23-nik ukiulik Aviaaja Storch Sisimiuninngaaneersoq inatsisilerituunngorniarluni Ilisimatusarfimmi ilinniarpoq. Ilinniarnermi saniatigut politiit vagtcentralianni serviceassistentitut sulisarpoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl