Kiffartuussinissamik isumaqatigiissutit kinguaattoortut
Silaannakkut umiarsuarmillu angallannikkut kiffartuussinissamik isumaqatigiissutit ukiunut tulliuttunut atuuttussat ukiormanna juunip qaammataani naammassineqarnissaat naatsorsuutigalugu attaveqaqatigiinnermut naalakkersuisup Knud Kristiansenip siorna novembarimi oqaatigaa.
Kiffartuussinissamilli isumaqatigiissutit qanoq isikkoqarnissaat suli saqqummiunneqanngillat.
Tunngaviusumik isummat pingasut isumaqatigiissummi tunngaviginiarneqartut tassaapput; "Aningaasaliunneqartunut angallanneq annerpaaq, akigitinneqartut ersarissumik aaqqissuussat eqaatsumillu ataqatigiissumillu angallanneq iluseqartinneqassaaq".
Suliariumannittut aqqaneq-marluk soqutiginninnerarlugit, naalakkersuisup siorna tusagassiortunik katersuutsitsilluni oqaatigaa.
Angallassisussalli sorliit Nunatta Karsianit millionilikkaanik pissarsissanersut atuisuusugut, suliariumannittullumi tusarnissaanut utaqqeqqaassaagut.
Aamma atuaruk Kiffartuussinissamik isumaqatigiissuteqarfiusunut billetsit akiisa 2/3-lii pisortat akilertarpaat
Angallannermi kiffartuussinissamik ukiormanna isumaqatigiissutit tamarmik 146 millionit koruunit sinnerlugit naleqarput. Taava ukiuni tulliuttuni isumaqatigiissutissanut aningaasat amerlanerit ikinnerilluunniit immikkoortinneqassanersut apeqqutaavoq.
Timmisartortitseqatigiit ingammik pissangapput. Nunatsinnimi timmissartuussinermi unammilleqatigiittut tassaapput Air Greenland, Aluu Airlines, Bristow Group qularnanngitsumillu allat - soorlu assersuutigalugu timmisartortitseqatigiit Islandimeersut.
Aamma atuaruk Naalakkersuisut Transparencyp isornartorsiuinera isumaqatiginngilaat
