Kielsen Siumukkullu qineqqusaarutissaaleqinngillat
Siumut qineqqusaarutai partiip siulittaasuata Kim Kielsenip, Karl Kristian Kruse, Doris Jakobsen Jensen Siumullu inuusuttaani siulittaasoq Steve Sandgreen peqatigalugit saqqummiuppai.
Naalakkersuisut siulittaasuutitaqarnissaq kiisalu partiit kikkulluunniit suleqatiginissaannut piareersimaneq tupaallaataanngitsumik Siumumiit qineqqusaarutiginiarpaat.
Qinersivik kingulleq qiviaraanni, Siumut, Atassut Demokraatillu siullermik naalakkersuisoqatigaat. Tamatuma kingorna Inuit Ataqatigiit Partii Nalerarlu naalakkersuisoqatigaat, taamaalilluni Inatsisartuni amerlanerussuteqarluartut suleqatigalugit.
Qineqqusaarutit qiviaraanni partiit allat qineqqusaarutit eqqarsaatigalugit isumaqatiginiarnissaanut periarfissat arlaqarput. Siumumiimmi qineqqusaarutit assigiinngitsorpassuupput
- Tamarmik immikkut pingaaruteqarput, Kim Kielsen oqarpoq.
AAMMA ATUARUK Meeqqat isumaat qineqqusaartunut anngunniarpai
Sammisat assigiinngitsut eqqaaneqartut ilagaat meeqqanut atugassarititaasut. Meeqqanut atugassarititaasut Kielsenip ukiortaami oqalugiaammini ilaatigut aamma eqqaavai. Mittarfiit nutaat aamma Siumumi qineqqusaarutit pingaarnerit ilagigaat partiimit saqqummiunneqarpoq. Taakkua attaveqarnermut takornariaqarnermullu pingaaruteqarluinnarneri tunngavigineqarlutik.
AAMMA ATUARUK Kikkut tamarmik nunatsinniissinnaasariaqarput
Aalisarnermut tunngasut aamma eqqaaneqarput. Aalisakkat, nunatta pisuussutai amerlanerusunut siaruarterneqassasut, aalisartullu amerlanerat nunatsinnut iluaqutaasoq Karl Kristian Krusep ilaatigut eqqaavaa.
Aalisarnermut inatsit qaqeqqinneqassasoq Siumumiit naatsorsuutigineqarpoq, taamaattoq qisuariaatigineqartut aallaavigalugit nalimmassaqqinneqarsinnaasoq aamma oqaatigineqarpoq.
Inuusuttunut inissiat amerlanerusut qulakkeerneqarnissaat Siumut inuusuttaaniit aamma oqaatigineqarpoq. Taamaaliornikkut inuusuttut amerlasuut nunatsinniit nuussimasut uterteqqinneqarnissaat pilerinarsarniarneqarluni.
