Meeqqat illersuisuat Meeqqat isumaat qineqqusaartunut anngunniarpai
Meeqqat Illersuisuata meeqqat inuusuttuaqqallu allannissaannik kaammattorpai eqqarsaataat kissaataallu qineqqusaarnermi pingaarutilittut sammineqarniassammata.
- Una pineruvara, tusaalaartigit aamma, meeqqat inuusuttullu suut aaqqittariaqartutut isigineraat, Aviaaja Egede Lynge taama oqarpoq.
AAMMA ATUARUK Qineqqusaarutissat arlaqarput
Facebookimi allannissamut kaammatuuteqarpoq, taannalu amerlasuunit qisuariarfigineqarpoq. Nittartakkatigut marsip ulluisa 14-anni kaammattuuteqarneranit iluarinnittut - Likertut, 582-upput, kaammattuullu 250-eriarlugu siammarterneqarpoq.
Qineqqusaartoqartarnernimi meeqqat pillugit suut qineqqusaarutigineqassanersut, meeqqat toqqaannartumik aperineqarneq ajortut, meeqqat illersuisuat isumaqarpoq.
- Meeqqat inuusuttullu atugaat qinersinermi allatigullu eqqartorneqartuartarput, kisianni amigaatigisara uaniilluni, eqqartorneqartillugit pineqartut aperineqartannginneri, Aviaaja Egede Lynge oqarpoq.
Meeqqat Inuusuttuaqallu pisinnaatitaaffeqarnerat ersersinniarneqarpoq.
- Meeqqat inuuusuttuaqqalu peqataatinneqarnissaminnut pisinaatitaaffeqarmata, uani periarfissaq taanna ammaakkusukkaku, taamaaliorsimavunga, Meeqqat Illersuisuat taama oqarpoq.
AAMMA ATUARUK Pisortat suliffeqarfiisa akornanni suleqatigiinnissaraluaq ingerlanngilaq
Meeqqat illersuisuata KNR-imut oqaluttuaraa nittartakkami nalunaarutinik arlalinnik takuneqarsinnaanngitsunik allaffigineqarsimalluni, taakkualu qineqqusaartunut ingerlateqqittussaavai. Ataasiakkaanik eqqaasaqarnianngikkaluarluni meeqqat inuusuttuaqqallu allassimasaasa ilaat suunersut oqaluttuarai.
- Assersuutitut taasinnaavakka, meeqqat silami aneertillutik aalakoortunut ersisarnerat, angerlarsimaffiit qiianarpallaartut taavalu aamma meeraalluni atornerlugaanermit ikiorserneqarpallaannginnermut tunngasut, maannamut tigoreerpakka, Meeqqat illersuisuat Aviaaja Egede Lynge taama oqarpoq, taassumalu meeqqat inuusuttuaqqallu nammineerlutik allassinnaanngitsut kaammattorpai allassinnaasunik ikiortilerlutik allaqqullugit.
18-liineqanngitsut kissaataat, partiinut tamanut inatsisartunullu qinigassanngortittunut apriilip ulluisa pingajuanni tunniunneqassapput.
