Nuutsitsinissaq Naalakkersuisut kingunissanik misissueqqaarniartut
Naalakkersuisut ilinniarfinnik sisamanik Nuummiit avataanut nuussiniarneranut tunngatillugu aalajangiisimanerlutik tamanut ammasumik isumaqatigiinngissuteqarnerat Kommuninut qinersinerup nalaani ukkatarineqarpoq.
Naalakkersuisup Sara Olsvigip Naalakkersuisunut siulittaasoq Kim Kielsen tv-kkut oqallinnermi akerlilerpaa.
Naalakkersuisut ilinniarfinnik nuussinissamut aalajangeereersimasut Kielsenip oqallinnermi oqaatigaa. Tamannani Olsvigip isumaqatiginngilaa.
- ilinniarfiit sisamat pillugit aalajangiisimasugut. Naalakkersuisuni taama iliunngilagut, ilinniarfinnilli sisamanik nuusseratarnerup kingunerisassai misissorpagut, Inuit Ataqatigiit siulittaasuat Sara Olsvig oqarpoq.
Siulittaasup Kielsenip naammagittaalliornera erseqqippoq:
- Siullermik Inuit Ataqatigiit siulittaasuata oqaasii naqqilaarusuppakka. Febuaarip qaammataani aalajangertoqarpoq. Ilinniarfiit sisamat nuunneqassapput, Kim Kielsen oqarpoq.
Kingornatigut ilinniartitaanermut naalakkersuisoq Doris Jakobsen aalajangiisoqarsimaneranik aalajangiisoqarsimannginneranilluunniit oqallinnermut akuleruppoq.
- Taanna maannakkut aalajangerneqarnikuunngilaq, (…) ataqatigiissaarisoqatigiit aalajangernikuupput, kingunissai misissorneqassasut, Doris Jakobsen KNR-imut oqarpoq.
Nuutsitsinissamut pilersaarut
- NI-Nuuk Qaqortumut Campus Kujallermut ilanngullugu.
- Jern- og Metali SIsimiunut.
- Eqqumiitsuliornermik atuarfik Aasiannut.
- Isumaginninnermut ilinniarfik Ilisimatusarfimmiit SPS Ilulissanut
Kilde: Naalakkersuisut
AAMMA ATUARUK Stadig uenigheder hos Naalakkersuisut
Arnallu taakku marluk eqqortumik oqalussimasoq maanna takutinneqarpoq. Naalakkersuisut marlunngornermi paasissutissiipput ilinniarfiit sisamat nuunneqarnissaasa kingunissaat misissorneqassasut aalajangerneqarsimasoq.
Misissueqqissaarneq ukioq manna septembarimi inaarneqassasoq naatsorsuutigineqarpoq, nuutsitsinissarlu aningaasaqarnermut inatsit 2018-imoortumut ilaatillugu oqallisigineqarnissaa pilersaarutigineqarpoq.
