Nunanut allanut unammisartut sungiusaasussaat toqqarneqartoq
![](/sites/default/files/styles/image_934x467/public/article_images/p1050081.jpg?itok=oLtTwju-)
Rene Olsen futsalimik nunanut allanut unammisartunut sungiusaassuussaaq. KAK-p siulittaasua John Thorsen KNR-imut taama ilisimatitsivoq.
Rene Olsen ukiorpassuarni Nunatsinni futsalimik isikkammillu arsaannermik ineriartortitseqataanikuuvoq. Taassuma Nunatsinni arsaanneq ilisimasaqarfigilluarpaa klubbillu ilisarisimalluarlugit. Nunanut allanut unammisartunut sungiusaasussamik ujaasinermi piukkunneqartut amerlasimapput, ilaatigut qallunaat nunaanniit piukkunnartoqarsimalluni. Taamaattoq Rene Olsen toqqarneqarpoq, tamannalu John Thorsenip nuannaarutigaa.
Tassami Rene Olsen nunanut allanut unammisartunut sungiusaasutut tunniusimasuulluni sulisareernikuuvoq ineriartortitsinissamik ungasinnerusumut isigaluni pilersaarusioqataanikuulluni. Minnerunngitsumillu Nunatsinni arsaannerup iluani oqaluttuarisaanerani pitsaanerpaamik angusaqaqataanikuulluni. Tamannalu KAK-p naammagisimaaqaa.
- Sungiusaasumik Nunatsinneersumik toqqaanerput iluarisimaarpara. Aamma KAK-p futsalillu ingerlariaqqissinnaalernera nuannaarutigaara, tamannami Nunatsinni arsaannermut aningaasaliisartutsinnullu pingaaruteqarpoq, Thorsen KNR-imut oqarpoq.
Kaassannguaq Zeeb, klubbimi Nuummeersumi unammisartuujutigaluni sungiusaasuusoq decembarimi Nordic Cuppeqarnerani nunanut allanut unammisartunut ikiortitut sungiusaassuullunilu unammeqataassaaq. Taassuma kingorna unaissaaq klubbimilu sungiusaasutut ingerlaqqissalluni.
Taassuma kingorna Kaassannguup ukiorpassuarni klubbeqatigalugu unammisartoqatigisimasaa minnerunngitsumillu arsaannerup tungaatigut isummersoqatigisarsimasaa, Anthon Overballe, nunanut allanut unammisartunut sungiusaasumut ikiortinngussaaq.
Anthon Overballe Nunatsinni pissartanngorniuuttarnerit misilittagaqarfigilluarpai nunanullu allanut unammisartuunikuulluni, taamaammallu aamma Nunatsinni arsaattartut ilisarisimalluarlugit.
Silami isikkammik arsaattartut nunanut allanut unammisartut sungiusaasussaannik KAK suli nassaarsimanngilaq, taamaattoq tamanna sulissutigineqartoq Thorsenip ilisimatitsissutigaa.
AAMMA ATUARUK Sungiusaasup soraarsitaanera aalassaataasoq nunarsuaq tamakkerlugu allaaserineqartoq
AAMMA ATUARUK John Thorsen GBU-mi siulittaasunngortoq