Kattusseqatigiit ilinniartitaanerup aningaasaliiffigineqarnera apeqquserpaat
Naalakkersuisut ilinniartitaanermut annertoorujussuarmik aningaasaliissuteqarniarnerannut atatillugu Kattusseqatigiit Partiiat, Inatsisartut suleriaasianni § 36 imm. 1 naapertorlugu naalakkersuisunut katillugit qulingiluanik apeqquteqaateqarpoq.
Ilinniartitaaneq pillugu pilersaarut, Inatsisartut upernaaq ataatsimiinnerisa nalaani saqqummiunneqareerpoq, massakkullu annertuumik aningaasaliisoqarnialerpoq.
Ilinniartitaanermut aningaasaliissutigineqartussat qanoq atorneqassappat? Aningaasaliisutissanik qanoq immikkoortiterisoqarniarpa? Aamma massakkut ilinniartooreersut eqqarsaatigalugit? Ilinniartunngorumaartut qanoq amerlatigissappat ? Ilinniarfiit qanoq aaqqissugaassappat qanorlu ineriartorteqqinneqassappat? Kattusseqatigiit siulittaasuat Anthon Frederiksen naalakkersuisunut ilaatigut taama apeqquteqarluni allappoq.
Aamma ilinniartut praktikkerfissaqarnissaat qanoq qulakkeerniarneqarnersoq Anthon Frederiksenip paaserusuppaa.
Ilinniartitaanermut aningaasaliissutissarpassuit eqqarsaatigalugit, qanoq ingerlatsinissamut pilersaarusiortoqarnersoq Kattusseqatigiit Partiiani siulittaasup aamma paaserusupaa.
