Katti Frederiksen naalakkersuisunngortoq: Tupinnaannartumik eqqissisimavunga
38-nik ukiulik, Katti Frederiksen ilinniartitaanermut, kultureqarnermut ilageeqarnermullu naalakkersuisunngorpoq.
Naalakkersuisut siulittaasuata Ane Lone Baggerimut (S) paarlaasussamik amigaateqarnerani takkuppoq.
Qineqqusaarnikuunngilaq, kiinaata assinga qineqqusaarnermi allagartarsuarni aamma takussaanikuunngilaq. Kim Kielsenimilli naalakkersuisunngortitaalluni – taamaakkaluartorli ilinniartitaanermut, kultureqarnermut ilageeqarnermullu naalakkersuisutut atuuffeqarnissaminut piareersimalluni misigisimavoq.
- Akisussaaffik taannarpiaq akiussaaffigilerakku nuannaarutigaara. Nammineq ilinniarigivara oqaasilerineq atuakkialerineq tusagassiutilerinerlu, maannamut ilisimasakka misilittakkakka aallaavigalugit misigisimavunga tunniussiseqataasinnaallunga, KNR-imut oqarpoq.
- Uanga nammineq Kalaallit Nunaanni peroriartortuuvunga, ilinniagaqarfiit assigiinngitsut aqqusaartarsimavakka, unammillernartut aamma ilaatigut suunersut, aamma nammineq tunuliaqutikka aamma nunani allani ilisimatusarfinni ilinniartarnikka eqqarsaatigalugit, takusinnaavakka aamma politikkikkut sulinikkut suut amigaataasarnersut, taakkununngalu tunniussaqarsinnaallunga misigivunga.
Arnaa aamma naalakkersuisuusimasoq
Katti Frederiksen nammineerluni politikkikkut suliaqarnikuusimanngilaq, arnaali Suka K. Frederiksen politikkikkut suliaqarnikuulluni. Taanna Siumumi ilaasortaallunilu namminiilivinnissamut ilaatigut naalakkersuisuusimavoq. Suka K. Frederiksen sivisuumik napparsimareerluni ukioq manna toqukkut qimaguppoq.
Taamatut aperineqarninni soorunami uaniitsippara qamaniitsingaarlugu, aamma takorloorpara inuugaluaruni qanoq oqarfigissagaluarpaanga. Imatut inernilerpara, imatut oqarsimassagaluarpoq: Katti, illit sorusuppit?
Katti Frederiksenip arnami politikkikkut suliaqarnissaminut kaammattorsimagaani oqaatigaa.
- Ilaana, aalajangiisooqataalluinnarpoq. Aamma nalunngilara maaniikkallarnermini assut nusunniartarnikuuvaanga politikkimut isertinniarlunga. Kisiat uanga allanik assigiinngitsunik patsiseqarlunga piareersimasarsimanngilanga, naalakkersuisunngorlaaq oqarpoq.
AAMMA ATUARUK Katti Frederiksen kultureqarnermut ilinniartitaanermullu naalakkersuisunngortoq
- Taamatut aperineqarninni soorunami uaniitsippara qamaniitsingaarlugu, aamma takorloorpara inuugaluaruni qanoq oqarfigissagaluarpaanga. Imatut inernilerpara, imatut oqarsimassagaluarpoq: Katti, illit sorusuppit? Taannalu immineq aallaavigalunga alloriarneq tiguvara.
Katti Frederiksenip assigiinngitsorpassuit maanna iserfigisussanngorpai. Ataaserli sulissutigissalluni maanna qularutiginngilaa:
- Tassa soorunami tamatta ilisimasatta pingaarnerpaat ilagivaat meeqqat atuarfianninngaanniit ingerlariaqqinngitsoortartut taakku ikilisarniarnissaat.
Erngertumik sulilertoq
Katti Frederiksen nutaatut naalakkersuisunngornissaminut Inatsisartunit sisamanngornermi ullup-qeqqata missaani akuerineqarpoq. Naalli kulturimut tunngasumik siullermeertumik oqaaseqartutut saqqummiusseqqaartussaagaluarluni ilorrisimaarpoq.
- Tupinnaanartumik eqqissisimavunga, pissangarulunnikuullunga ullaaq iterpunga, eqqissisimaqqinnaarlunga ingerlaannarlu oqaaseqartussanngorama oqaluttarfimmukarama eqqisseqqinnaarlunga taanna ingerlappara. Tassa toqqissisimavunga, misigivunga aamma tunuliaqutagissaarlunga tapersersorneqarlunga aamma suleqatiserinninnermik nipilimmik oqariartuuteqarrammata suleqatiginissaat qilanaarivakka. Misigivunga tikilluaqqusaallunga, Katti Frederiksen oqarpoq.
Katti Frederiksen Narsami inunngorpoq, Ilisimatusarfimmilu oqaasilerinermik, atuakkialerinermik tusagassiuutilerinermillu cand.mag-imik ilinniagaqarluni.
Taanna Oqaasileriffimmi pisortaavoq aamma Nuuk cafémik pigisaqarnikuulluni, taannali siorna akigivaa.
