Katsorsaaneq nutaaq: Kinguaassiuutitigut pinerluttutut eqqartuunneqarsimasut killissat paasinissaat ilinniassavaat
Ungasinngitsunnguakkut Nuummi Pineqaatissinneqarsimasunut Inissiisarfimmi kinguaasiuutitigut pinerluuteqarsimasunut ulluinnaq nutaq aallartissaaq. Ataasinngorpamiimmi suliniutit marluk peqataaffigisassaat aallartissammata.
Siunertaavoq kinguaassiuutitigut pinerlussimasut pinerluutimik kingunerisaasaallu paasissagaat kingusinnerusukkullu katsorsarneqarnissaminnut akuersinissaat.
Tarnip pissusiinik ilisimasalik Marianne Fuglestved suliniutinik tassunga assingusunik danskit parnaarussiviini arlalinni ineriartortitseqataasimasoq taama nassuiaavoq.
- Inissinneqarsimasut erseqqissaavigineqassapput inuit tamarmik qanoq killeqarsinnaatitaanerannik, aamma meeqqat, inuusuttut inersimasullu kinguaasiuutitigut killigisaat qaangerneqaraangata qanoq ajoquserneqartarnerinik.
Taamatut paasisaqartitsinikkut neriuutigineqarpoq inuit arlallit kinguaassiuutitigut pinerlunnikkut eqqartuussaasimasut katsorsarneqarnissamut neqeroorummut akuersissasut, assersuutigalugu katsorsaavimmi Nuummiittumi "Klinik Killiliisa"-mi.
Kinguaassiuutitigut pinerluuteqartut pinerlunnertik miserratigat
Massakkuugallartoq Nuummi pineqaatissinneqarsimasunut inissiivimmi betjentit arfinillit sulisullu allat pingasut suliniutini taakkunani marlunni ilinniartinneqarsimapput.
Suliniullu kinguaassiuutitigut pinerlunnermik eqqartuunneqarsimasunut sammitinneqarmat immikkut ittumik peqquteqarpoq, Marianne Fuglestved oqarpoq.
Kinguaassiuutitigut pinerluuteqarsimasunut eqqartuunneqarsimasunut suliniutit marluk
Kinguaassiuutitigut pinerluuteqarsimasunut eqqartuunneqarsimasunut sivikinnerusuinnarmik nammineersinnaajunnaarsitaasunut suliniut sapaatip akunnerinik pingasunik sivisussusilik. Suliniummi pingaartumik ukkatarineqarput kinguaassiuutitigut killigititat aamma “naagga”-p qanoq isumaqarnera kiisalu inatsisit.
Kinguaassiuutitigut pinerluuteqarsimasunut eqqartuunneqarsimasunut sivisunerusumik nammineersinnaajunnaarsitaasunut suliniut sapatip akunnerinik arfineq pingasunik sivisussusilik. Sammisat kinguaassiuutit atornerat killigititallu saniatigut aamma misigissutit iliornerillu aqussinnaanissaat pineqarpoq. Saniatigullu aamma inissitaq ikiorneqassaaq qanoq ililluni pinerluttaarnermik unitsinnissaanut.
Massakkuugallartoq Nuummi pineqaatissinneqarsimasunut inissiivimmi kinguaassiuutitigut pinerlunnermik eqqartuunneqarsimasunut arfineq pingasunut inissaqarpoq.
- Kinguaassiuutitigut pinerlunnermik eqqartuunneqarsimasut kukkusumik iliorsimanerminik miserrateqarajuttarput. Taannalu miserratigigunikku soorunami katsorsarneqarnissaq itigartitsossutigissavaat.
Miserratiginninnermut attuumassuteqarpoq kinguaasiuutitigut innarliinerit kanngunartaqimmata – inissiiviup iluani silataanilu.
- Suliniutit uku ikiuutissapput qanoq iliorsimanerminnik eqqarsalernissaannut akisussaaffimmilu tigusinissaannut aamma katsorsarneqarnissamut akuersinissaannut, Marianne Fuglestved oqarpoq.
Ilaatigut danskit parnaarussiviiniit misilittakkat takutippaat katsorsaanerit kinguaassiuutitigut pinerlussimasut eqqarsartaasiannik allanngortitsisinnaasut. Tamannalu pingaartorujussuuvoq – eqqugaasunut aamma inuiaqatigiit sinnerinut, Nuummi Inissiivimmi pisortaq Peter Fomsgaard oqarpoq.
- Aneqqittussaappummi – amerlanerpaartaat – aamma ilinnut uannullu sanilinngorsinnaallutik. Taamaattumik taakkununnga, inuiaqatigiinnut ilaqutaannullu pingaartuuvoq eqqarsaataannik allanngortitsisinnaaneq innarleeqqeqqunagit.
- Siunertaasut pingaarnersaraat maani isersimatillutik inuttut pitsaanerullaartunngortinnisaat eqqarsalernissaannullu iliuuserisimasamik suup eqqortunneranik suullu eqqunngitsuuneranik, KNR-imut oqarpoq.
