Inatsit nutaaq suliarineqalerpoq: Meeqqanik inuusuttunillu pinngitsaaliilluni atoqateqarneq sakkortunerusumik pineqaatissiissutigineqartalissaaq
Kinguaassiuutitigut innarlerneqaraanni inuunerup sinnera tarnikkut qileroqartitsilersarpoq – minnerunngitsumik meeraagaanni.
Taamaattumik pineqaatissinneqarneq ullumernit annertunerussaaq. Naalakkersuisut aamma danskit naalakkersuisui taama isumaqarput, ilaatigullu kissaatigaat meeqqanik inuusuttunillu 18 inorlugit ukiulinnik pinngitsaaliilluni atoqateqarneq pineqatissiissut 50 procentimik qaffanneqassasoq.
Tamanna inatsisissatigut ataatsimoortutigut annertuukkut 377-inik quppernilikkut pissaaq, Folketingilliu massakkut suliarisussanngorpaa, taamaaliornikkullu eqqartuussisaatsimut inatsit aamma pinerlunneq pillugu inatsit allanngortinneqassapput.
AAMMA ATUARUK Naaja Nathanielsen: Meeqqanik pinngitsaaliisartut sakkortunerusumik pineqaatissinneqartariaqarput
Ullumikkut pinerluttoq ukiut 2,5-t aamma 3,5-it akornanni inummik 18 inorlugit ukiulimmik kinguaassiutitigut innarliisimaguni pineqatissinneqartarpoq, inatsisilli allanngortinnerisa kingornatigut ukiut 3,5 aamma 5 akornanni nammineersinnaajunnaarsitsineqartalissaaq.
- Neriuutigaara inatsisissatut siunnersuutip kingunerissagaa siunissami kinguaassiutitigut innarliisarnerit ikilisissagai taamalu Kalaallit Nunaanni meeqqanut inuusuttunullu allannguilluni, inatsisit atuutsinneqarnerannut ministeri Nick Hækkerup (S) oqarpoq.
Eqqugaasumik pinerluttumillu annertunerusumik ikiuineq
Inatsisit ataatsimoortut akuerineqassappata aamma kingunerissavaa Kalaallit Nunaanni kinguaassiutitigut innarlerneqartut annertunerusumik ikiorneqartalissammata.
Assersuutigalugu eqqugaasoq siunissami politiinit apersorneqartilluni aamma eqqartuussivimmi suliaqarnermi illersuiseqartalissaq. Illersuisi oqartussanit akilerneqatassaaq, taamalu eqqugaasup nammineq akilertassanagu.
AAMMA ATUARUK Politiit qarasaasiatigut kannguttaatsuliorniartartut unnerluunneqarsinnaaneri qaammarsaavigaat
Aamma siunissami pinerluttup iperagaaneranik politiit eqqugaasoq nalunaarfigisassavaat, imaluunniit taanna tv-kkut radiokulluunniit peqataassappat.
Pineqaatissiisimasunut inissiisarfinnik ikiaroornartunik misissuineq
Inatsisissat ataatsimoortut ukiuni arlalinni piareersarneqarsimapput suliarineqalerlutillu suleqatigiit eqimattat kalaallit-danskit innersuuteqarnerat tunngavigalugu, aamma Naalakkersuisut aamma Kalaallit Nunaanni Eqqartuussiveqarneq pillugu Siunnersuisoqatigiit oqaloqatigisarnerisigut.
Inatsisini ataatsimoortuni eqqugaasoq qitiutinneqarpoq, kisianni aamma pineqaatisssinneqarsimasunut inissiisarfiit pillugit suliniutinik imaqarluni.
Assersuutigalugu sulisut pulaartunik tamanik imigassamik imaluunniit ikiaroornartunik peqarnersut misissortassavaat. Aamma inissinneqarsimasut taakkuninnga tamanik misissorneqafrtassapput, silammut anersaartitsinikkut aamma quumik misissuinikkut.
Aamma tamatuma saniatigut Nuummi pineqaatissinneqartunik kinguaassiutitigut pinerlussimasutut eqqartuuneqartut passussinissamik neqerooruteqarfiginissaat periarfissinneqassaaq.
- Sammisat taakku tamarmik Kalaallit Nunaani politikikkut pingaartinneqaqaat. Ataatsimoorlutik innuttaasunut inatsisitigut isumannaatsuunermik aamma eqqortuuneranik misigissutsimik qaffaaqataassapput, Naaja H. Nathanielsen (IA) Aningaasaqarnermut, Aatsitassanut, Inatsisit Atuutsinneranut Naligiissitaanermullu Naalakkersuisoq oqarpoq.
Inatsisissatut ataatsimoortut pingasunngormat Folketingimut saqqummiunneqarput. Inatsisissatut siunnersuut tamaat takusinnaavat uani.
