Politiit qarasaasiatigut kannguttaatsuliorniartartut unnerluunneqarsinnaaneri qaammarsaavigaat
Internetimut attaveqaruit mianersornissat pingaaruteqarpoq. Qarasaasiatigut inuit naapittarfiini atuisut amerlasoorujussuupput, ilaallu meeqqanik inuusuttunillu atornerluiniartartuullutik.
Taakkua allaasuusaarlutik meeqqat inuusuttuaqqalluunniit kinguaassiuutitigut atornerlunniarlugit tatiginnilersinniarsarisarpaat.
Groomingimik taanna taaneqartarpoq.
Politiit tamanna pinaveersaartinniarlugu videomik saqqummersitsipput.
- Grooming tassaavoq inersimasoq, meeqqamut inuusuttumulluunniit qaninngoorniarsarisoq tatigineqaqqulluni iliuuseqartoq. Kinguaassiutitigut atornerluinissamik imaluunniit assinik videolianilluunniit atisaqanngitsunik meeqqaminngaanniit piniarsariniarluni siunertaqartoq, Kalaallit Nunaanni Politiini vicepolitiinspektøri Viggo Johansen oqarpoq.
Politiinut unnerluutigineqartut ikittut
Nunatsinni ukiukitsunik nittartakkatigut atornerluisartut Politiinut nalunaarutigineqartartut amerlanngitsut, Kalaallit Nunaanni Politiit kisitsisaataanni takuneqarsinnaavoq.
Sioorasaarisoqartarneralu nalunaarutiginnittoqarpiartannginneranut pissutaasinnaasoq
vicepolitiinspektørip Qanoruumut sapaatit akunnerata siuliani oqaatigaa.
- Assersuutigalugu assimik nassitsisimagaanni allanik takoqqusaanngitsumik, taava siorasaarinertaqarsinanavoq asseq taanna saqqummiunneqassooq internetikkut. Imaluunniit allatigut soorlu aningaasanik piumasaqarnikkut aamma sioorasaarisoqarsinnaavoq. Assigiinngitsuusinnaapput peqqutit taamaattut, Viggo Johansen taama oqarpoq.
Politiillu taamaattoqarnissaa videomik saqqummersitsinermikkut pinaveersaartinniarpaat. Meeqqat ukiukitsullu taama nalaataqarsimasut inersimasunut politiinulluunniit nalunaarutiginninnissaannut vicepolitinspektørip kaammattorpai.
- Killissamik qaangiiffigineqarsimagunik tamakkulu pinaveersaartinnissaa. Meeqqat inuusuttullu nammineerlutik eqqarsarluarnissaat siunertaraarput, killiliisinnaassusaat qaffassarniarparput. Taassuma saniatigut killissamik qaangiiffigineqarsimagunik killiliisinnaanngorlugit, inersimasunut allamut oqaatigeqqullugu politiinulluunniit nalunaarutigeqqullugu.
- Kingunerlorujussuarsinnaagami inummut nammineerluni taamatut pineqarsimagaanni, Viggo oqarpoq.
Qarasaasiatigut inuit naapittarfiini pinerlussimasut politiinut 70 14 48-mut nalunaarutigineqarsinnaapput.
Politiit videoliaat uani takusinnaavat:
