Kasper Hjulmand Nunatsinni timersornermi isummersoqataaniarpoq
![Morten Rutkjær og Kasper Hjulmand 2023](/sites/default/files/styles/image_934x467/public/2023-05/345456826_570106051876482_8294834348017857287_n.jpg?itok=q-_ZHEPk)
Silami arsaannermi Nuummi sungiusarnerit siulliit ilaat sapaatip akunnera kingulleq pisoq qallunaat nuna tamakkerlugu sungiusaasuata najuuffigivaa.
Kalaallit nuna tamakkerlugu sungiusaasuata Morten Rutkjærip sungiusarneq aquppaa sungiusaasoqataa ungataani malinnaasoq. Sungiusareernermilu arsaanneq eqqartorneqarpoq.
- Uagutsinnut qiimmassaaterujussuuvoq tapersersormatigut, Morten Rutkjær KNR-mut oqarpoq.
- Aamma tamanna aqqutigalugu maani suliniutitta ajunngitsumik siunnerfeqarnerat uppernarsisinnaavarput aammalu isumassarsiorsinnaalluta suleriuserineqarsinnaasut eqqarsaatigalugit, Morten Rutkjær oqarpoq.
Københavnimi arsaattartuni B93-m i unammisartuunikuuvoq taamanilu Kasper Hjulmand iligisarlugu.
Hjulmand nuummiuunikuuvoq
Qallunaallu sungiusaasuata kalaallit arsaattarneranni suleqataarusunneranut tunngaviusut ilagaat arsaannerup timersornerullu inuiaqatigiinnut sunniuteqarsinnaanerat.
- Isumaqarpunga meeqqat timersornerulersinnissaat pillugu inuiaqatigiinni kikkut tamarmik suleqatigiissinnaappara pissarsiassaq annertoorujussuusoq, Kasper Hjulmand KNR-mut oqarpoq.
FNip meeqqat pisinnaatitaaffianut UNICEFimut ambassadøriuvoq, taakkulu sapaatit akunnera kingulleq meeqqat timersornerulernissaat pillugu annertuumik isumasioqatigiisitsipput suliniaqatigiiffiit kommunellu peqataaffigissaannik.
- Immaqa suliassat qanoq naammassiniarneqarsinnaanerat pillugu isumassarsiortitseqataasinnaavunga. Aamma qanoq takorluugaqarsinnaaneq eqqarsaatigalugu, Kasper Hjulmand oqarpoq.
- Immikkuutitaarluni sulinnginnissaq eqqarsaatigisariaqarpoq suleqatigiinnerli ujartorlugu. Aamma namminersorlutik inuussutissarsiortut, kommunet timersornerlu suleqatigiissinnaapput atortut pitsaanerulersillugit, sungiusaasut pikkorinnerulersillugit aammalu Kalaallit Nunaat tamakkerlugu ilisimasanik paarlaasseqatigiilluni, Kasper Hjulmand oqarpoq.
Meeraanermi ilaa Nuummi najugaqarsimavoq angutaa KNR-mi radiomi timersornermi aallakaatitassiortarluni najaalu Nuummi aamma inunngortuulluni.
- Taamaattumik Kalaallit Nunaat asasorujussuuara, Kasper Hjulmand naggasiivoq.