Unammersuariaaseq nutaaq: Divisionikkaarluni arsaanneq
Angutit inersimasut arsaannermi pissartanngorniuttarneranni siunissami divisionini qaffanniullunilu arpariarnaversaarluni unammisoqartalersinnaavoq.
Tassami iligiit pikkorinnerit appasinnerusullu divisioninut marlunnut avillutik unammersuartalissapput.
Unamminerit naliiffiusut amerlanerit pilersinniarneqarput unamminerillu isertitatigut naligiinngiffioqisut ikinnerulersillugit.
AAMMA ATUARUK Arsaanneq: Peqatigiiffiit allanngueqqusipput aalajangertoqartussanngormalli nipaarullutik
Arsaattartut kattuffiat KAK unammersuariaasiusinnaasunik marlunnik siunnersuusiornissamik suliassinneqarpoq siunissamilu unammersuariaasissap aalajangersarnissaani peqatigiiffiit isummersoqataatinneqassapput.
Siunissami unammersuariaasissaq pillugu KAKp isumasioqatigiissitsinnerani sapaatip akunnerata siuliup naalernerani oqallinneq taama eqikkarneqarpoq. Peqatigiiffiit 16-it isumasioqataapput.
- Unammersuariaasissaq pillugu isummat assigiinngitsut saqqummiussorneqarput. Unnuup ingerlanerani oqallinnermi sammivik ataasiunerulerpoq, KAK-mi siulittaasoq Benjamin Kielsen KNR-mut oqarpoq.
- Siunnerfigineqarpoq inersimasut pissartanngorniunnerat divisionikkaartumik pisalissasoq. Unammersuariaasiusinnaasunik marlunnik KAK siunnersuusioreerpat sorleq atorneqassanersoq peqatigiiffiit isummertinneqarumaarput, Benjamin Kielsen oqarpoq.
Unamminerit amerlanerulissapput
Ukiut qulikkaat arlalissuit ingerlaneranni pissartanngorniunnerit sioqqullugit anngunniunneq pereeraangat sapaatip akunnera missaliorlugu GM naggataarlugu unammisoqartarpoq.
Ukiut arlallit kissaatigineqartarpoq ukiup arsaaffiusup ingerlanerani unamminerit amerlanerussasut aamma unamminerit naligiiffiunerussasut.
Aappaagu silami arsaannermi futsalimilu pissartanngorniunnerit qaqugu pinissaat KAKp saqqummiuteqqammerpaa.
Angutit inersimasut futsalimi apriilip qeqqani Ilulissani pissartanngorniutissapput arnallu porskip nalaani angutit unamminissaat sapaatit akunnerinik marlunnik sioqqullugu Nuummi unammersuassallutik.
2023 ikaarsaariarfittut?
Silami angutit pissartanngorniunnerat Qaqortumi pissaaq arnallu unammersuarnerat Nuummi pissalluni.
- Futsalimi pissartanngorniuttarneq eqqarsaatigalugu ukiamiit divisionikkaartumik unammisalernissaq periarfissaanersoq eqqaaneqarpoq, Benjamin Kielsen oqarpoq.
Siunissamili unammersuariaasissanut siunnersuutit qaqugu peqatigiiffinnut saqqummiunneqassanersoq oqaatigisinnaanngikkallarpaa.
- 2023-ip ikaarsaariarfittut atuussinnaanera eqqaaneqarpoq unammersuariaasissarlu 2024-mi tamakkiisumik atuutsilerlugu, Benjamin Kielsen naggasiivoq.
