Arsaanneq: Peqatigiiffiit allanngueqqusipput aalajangertoqartussanngormalli nipaarullutik
![Fodbold GM 2022 - B-67 - G-44](/sites/default/files/styles/image_934x467/public/article_images/image001_0.jpg?itok=o2ATvb3T)
KAK-mi ataatsimeersuarnermi siorna aalajangiunneqarpoq unammersuariaatsit nutarterlugit illup iluani silamilu arsaannermi unamminerit amerlanerulissasut.
Peqataarusuttulli ikittuararsuupput isumasioqatigiinnissamut KAK septemberimi sapaatip akunneralu kingulleq qaaqqusimmat.
- Una aalajangernissaq annertuujuvoq siulersuisuniillu nalilerparput siulersuisut kisimik aalajangissappassuk aalajangernissaq annertuallaartoq, KAK-mi siulittaasoq Benjamin Kielsen oqarpoq.
- Taamaattumik peqatigiiffiit ilaasortavut peqatisernikuuagut siunissami unammersuariaasissaq pillugu isumasioqatigiinnissamut, Benjamin Kielsen oqarpoq.
Peqatigiiffiit 50-it missaanniittut KAK-mi ilaasortaapput tamarmillu isumasioqatigiinnissamut qaaqqusaallutik internet aqqutigalugu pisussaagaluartumut.
Silami arsaannermi GM augustimi pisoq KAKp allattoqarfia aamma ilisimatitsilluni ataatsimiisitsivoq tassanilu peqatigiiffiit kajumissaarneqarput siunissami unammersuariaasissaq pillugu siunnersuutinik nassiussaqaqqullugit.
Sunniuteqarnissamut periarfissaq kingulleq
- Peqatigiiffinniit siunnersuutinik tigusaqarnikuunngilagut, Benjamin Kielsen oqarpoq.
Maannali KAKmi siulersuisut peqatigiiffinnut periarfisseeqqipput siunissami futsalimi silamilu arsaannermi GM qanoq ingerlanneqartassanersoq pillugu. Isumasioqatigiinnissamut qaaqquseqqipput tamannalu decemberip arfineq pingajuat pissaaq.
- Sunniuteqaqataanissamut naggataamik periarfissiivugut. Isumasioqatigiissaagut nalunaartut ikikkaluarpataluunniit, Benjamin Kielsen oqarpoq.
- Neriuppungali peqatigiiffiit ilaasortavut piareersarluarsimallutik siunissami unammersuariaaseq pillugu saqqummiussaqarumaartut. Aalajangernissaq nukiginnarsivoq. Tassami aappaagu unammersuarnerit sumi ingerlanneqarnissaat pillugu nalunaareertussaagaluarpugut, isumasioqatigiinnissarli naammasseqqaarlugu aalajangerusuppugut, Benjamin Kielsen oqarpoq.
AAMMA ATUARUK Benjamin Kielsen KAK-mi siulittaasunngorpoq
Siunissami unammersuariaasissami pingaarnertut anguniarneqarpoq ukiumi unammiffiusumi unamminerit amerlanerusut pisalernissaat.
Siunnersuutinik saqqummiussaqarnissamut isumasioqatigiittoqarnissaa Benjamin Kielsenip utaqqimaarallarpaa.