Benjamin Kielsen KAK-mi siulittaasunngorpoq
Benjamin Kielsen Narsameersoq 14-init taaguunneqarluni KAK-mi siulittaasussarsiornermi ajugaavoq unammillertaa John Thorsen Nuummeersoq arfineq marlunnit taaguunneqartoq.
KAK-mi siulittaasutut tunuartup Finn Meinelip kattuffik 2020-mi 2,3 millionit koruuninik sinneqartooruteqartoq ingerlatseqqittussanut tunniuppaa.
Siulittaasoq Benjamin Kielsen
Siulersuisuni ilaasortat:
Looqi Svane, Nuuk
Tønnes O.K. Berthelsen, Nuuk
Lisa Lind Pedersen, Nuuk
Victoria Black, Nuuk
Dorannguaq Eriksen Nielsen, Aasiaat
Aron Jonathansen, Tasiilaq
- Aningaasat isumatusaartumik aningaasat atorneqassapput aningaasartuutissanik pilersaarusiorneq suliarilluagaasariaqarluni, Benjamin Kielsen KNR-mut oqarpoq.
AAMMA ATUARUK Benjamin Kielsen KAK-mi siulittaasunngorusuppoq: Meeqqat isikkammik arsartarnerat ineriartortinneqassaaq
Ataatsimeersuarnermi aamma naqissuserneqarpoq sinneqartooruteqarnissaq imminermini siunertaanngitsoq aningaasalli arsaannermi sammisaqartitsinermut atorneqassasut.
2020-mili nuna tamakkerlugu pissartanngorniuttoqannginnera aningaasarpassuarnik sipaartitsisoq oqaatigineqarpoq.
Siulersuisuini ilaasortat nutaartaqalerput kattuffiullu oqaluttuarisaanerani siullerpaamik arnat pingasut ataatsimikkut siulersuisuniilerput siulersuisuni arfineq marlunnik inuttaqartumi.
AAMMA ATUARUK John Thorsen KAK-mi siulittaasunngorniaqqilerpoq
- Tassuuna takuneqarsinnaavoq arnat sammineqarnerusariaqartut. Ukiut kingulliit aamma arnat aallunneqarnerulerput tamannalu nangissavarput, Benjamin Kielsen oqarpoq.
Siulersuisunngortut suliassarpassuaqarput.
Unammersuartitsisarnerup allannguuteqarsinnaanera misissorneqartussanngorpoq arsaattartut unammisarneri amerlisarniarlugit aappaagumullu pissartanngorniunnissat taama pilersaarusiorneqartussanngorlutik.
