John Thorsen KAK-mi siulittaasunngorniaqqilerpoq
Nuummi timersoqatigiiffiit arsaannermik ingerlataqartut suleqatigiiffiata NBU pingasunngornermi unnukkut ataatsiminnermi John Thorsen Nuummeersoq kajumissaarpaa siulitttaasussatut sassaqullugu. Benjamin Kielsen Narsameersoq siulittaasunngorniarnermut sassarluni nalunaareersoq taamaasilluni unammillerneqarpoq.
- Sassaqqinnissara sapaatit akunnerini arlalinni isumaliutigivara ippassarlu ataatsimiinneq aalajangerniarninnut aalajangiisuuvoq, John Thorsen KNR-mut oqarpoq.
Nunatsinni arsaattartutn kattuffiisa pingaarnersaanni takornartaanngilaq. Kattuffik GBU-mik taaguuteqarallarmat 2011-mi siulersuisuni ilaasortaalerpoq.
John Thorsen siullerpaamik GBU-mi 2014-mi siulittaasunngorpoq taamanikkut siulittaasuusoq Lars Lundblad napparsimalernini pissutigalugu tunuarmat.
AAMMA ATUARUK Benjamin Kielsen KAK-mi siulittaasunngorusuppoq: Meeqqat isikkammik arsartarnerat ineriartortinneqassaaq
Kingusinnerusukkut ileqquusumik ataatsimeersuarnmermi John Thorsen siulittaasutut qinigaavoq.
Timersuutit akisuut
2019-mi siulersuisuniit tunuarpoq maannalu KAK-mik sullisseqqinnissamut piumassuseqarluni.
- Timersuutit marluusut KAK-p ingerlataasa aningaasatigut tunngavissaqarnissaa sulissutigerusuppara, John Thorsen oqarpoq.
- Silami arsaanneq aamma illup iluani arsaanneq futsal ingerlanneqarput taakkulu tamarmik aningaasarpassuarnik atuiffiusarput. Sulissutigerusuppara angutit arnallu nunanut allanut unammisartoqaannarnissaat inuusuttullu nunanut allanut unammisartoqalernissaat, John Thorsen oqarpoq.
AAMMA ATUARUK John Thorsen GBU-mi siulittaasunngorpoq
Arfininngorpat ullaap tungaa ataatsimeersuarnermi qineqqusaarluni oqalugiarnissaminut piareersimavoq. Tassami Finn Meinel tunuarniarluni nalunaareermat nutaamik siulittaasussarsiortoqalerpoq.
- Arsaannerup iluani politikkimik suliaqarnermik misilittagaqarpunga. Suliassamut piareersimasutut misigisimavunga, John Thorsen oqarpoq.
Malittarisassat malillugit suli allat siulittaasunngorniarsinnaapput. KAK-p malittarisassai malillugit ataatsimeersuarneq aallartereersoq siulittaasussatut sassartoqarsinnaavoq.
