Karen Marie Kyed Meyer timersullammanngorpoq
![](/sites/default/files/styles/image_934x467/public/article_images/familie630.jpg?itok=sPz47Iwf)
![](/sites/default/files/styles/image_934x467/public/article_images/roert_630.jpg?itok=a9ZOJSDZ)
![](/sites/default/files/styles/image_934x467/public/article_images/albrecht630.jpg?itok=NQhyTJfS)
Assammik arsartartoq Karen Marie Kyed Meyer NÛK-meersoq qaaqquneqarsimavoq timersornermut atuakkap 2011-mi saqqummersinnissaanut najuuttussatut.
Ilaqutaali allatut kalerrinneqarsimapput Timersortartullu illuanni Nuummi piareersimallutik Karen Marie Kyed Meyer politiit juullimut arsaanneranni peqataareerluni suli kiagulluni iserluni tupaallaatissinneqarmat.
Ukiorpassuarni timersullaqqissutut ingerlasimanera toqqaanermi tunngavigineqarpoq tamannalu Air Greenland aamma Sermitsiaq suleqatigalugit pivoq.
Assammik arsartartoq taanna saamik arnat nunanut allanut unammisartoqalermatali peqataajuarpoq aammalu takutitsilluartarnermigut meeqqanut inuusuttuaqqanullu maligassiuisuulluni, timersoqatigiit kattuffianni siulittaasoq Nuka Kleemann tunngavilersuivoq.
- Takorloorsimanngisaannarpara timersullammattut toqqagaanissara. Assut tupaallappunga aamma timersullaqqisorpassuaqarmat. Tuppalliutiginerpaavaralu meeqqanut inuusuttunullu maligassiusutut taaneqarnera. Tamanna ulluinnarni eqqarsaatigineq ajoraluarpara, Karen Marie Kyed Meyer KNR-imut oqarpoq.
GM-mi peqataarngaarpoq 1988-mi K-33 sinnerlugu inersimasuni inuusuttuaqqanilu peqataagami. Maanna ukiorpaalunngortuni NÛK arsartutut pingaarutilittut inissisimavoq.
- Taamatut toqqagaanera assut piumassutsimik tunisivoq. Timiga pisinnaatillugu timersortuassaanga. Immaqa arsarfimmiit anninneqaruma aatsaat unikkumaarpunga neriuppungali ajoquserneq pissutigalugu taama pisoqassanngitsoq, Karen Marie Kyed Meyer timersoriaqqinngilaattaa taama oqarpoq.
Siulersuillammammik aamma toqqaasoqarpoq tassanilu Lars Karlsen Ikerasaarsummeersoq toqqarneqarpoq. Taanna timersoqatigiiffimmi Inussummi siuttuuvoq nunaqarfitsillu arsaaffeqanngikkaluartoq Nunatsinni pissartanngorniunnernut Niaqornaarsummiut peqataasalernerannut ilungersuutiginnittuulluni.
Ukiumi sungiusaallammattut toqqarneqarpoq Albrecht Damgaard B-67-ip sulorartartuineersoq. Taanna siornatigut arlaleriaqaluni pissartaasarsimasoq piukkunnaatilippassuarnik ineriartortitseqataasarsimavoq, sungiusagaalu arlallit nunanut allanut unammisartuni sunniuteqarluartarput.
Albrecht Damgaard sulorartartutut 1969-mi aallartippoq 1990-kkullu qiteqqunneranni B-67-mi sungiusaasunngorluni. Aamma nunanut allanut unammisartuni peqataasarsimavoq aammalu 1980 Nunatsinni timersullammattut toqqagaalluni.