KANUNUPE tulliani ataatsimeersuarnissamut nutaamik siulittaasortaartoq

Nunaqarfimmiut peqatigiiffiata KANUNUPE-p siulittaasua Ingvar Motzfeldt tunuarpoq.

Taamaalilluni KANUNUPE-p siulittaasuata tullia ataatsimeersuarnissap tungaanut siulittaasuugallassaaq. 

Qaquguli ataatsimeersuarsinnaanersut nalunartoq, peqatigiiffiup siulittaasorigallagaa, Per Ole Frederiksen paasissutissiivoq.

Ingvar Motzfeldtip tunuarnissani nammineerluni kissaatigisimagaa, taanna oqarpoq.

- Siulittaasoq Ingvar Motzfeldt inuttut assigiinngitsunik pissuteqarluni tunuarniuteqarnikuuvoq. Taamaalillunilu tunuarniutaata siulersuisunit ataqqineqarluni oqaluuserineqarnerani ataqqillugu akuerineqarnikuulluni, Per Ole Frederiksen oqarpoq.

KANUNUPE-mi 2022-mit siulittaasoq Karl Petersen 2024-mi toqummat, taamani siulittaasumut tulliusoq Ingvar Motzfeldt siulittaasunngorpoq.

Ingvar Motzfeldtili tunuarniarluni aggustip ulluisa 15-ianni nalunaartoq, Per Ole Frederiksen oqarpoq.

Taannalu aggustip ulluisa 20-annit tulliani ataatsimeersuarnissamut siulittaasuugallartutut atuuffeqalerpoq.

Ataatsimeersuarneq kinguartinneqartareersoq

Tullianili ataatsimeersuarnissaq suli ullulerneqanngilaq. Ataatsimeersuarnissarlu ajornakusoortortaqareerpoq.

- Aningaasaqarnikkut killiffipput eqqarsaatigalugu, aningaasarpassuaateqannginnatta imaaliinnarluta KANUNUPE-p ataatsimeersuarnissaa naammassisinnaasimanngilarput.

KANUNUPE-mi ilaasortat qassiunersut apeqqutaatillugit kommuninit aningaasaliiffigineqartarpoq.

Aningaasatigut unammillernartoqartoq aamma naalakkersuisut maluginiarpaat.

- Aaqqissuussiffiup kommuninit tapiissutissanik pissarsisimannginnera pissutigalugu KANUNUPE siulersuisuminut qinersisinnaasimannginnera 2025- novembarimit allaqatigiinnerni takuneqarsinnaavoq, naalakkersuisut allapput.

Kommunilli tamarmik maannakkut akiliuteqarsimasut, Per Ole Frederiksen paasissutissiivoq.

Siorna marloriarlutik ataatsimeersuarniarsimagaluarlutik, Per Ole Frederiksen oqarpoq.

Siullermik oqarasuaatitigut internettikkullu attaveqaatitigut Inatsisartunut qinersinerup kinguninngua ataatsimeersuarniarsimagaluarput, ingerlatsisussarli pisinnaajunnarsimalluni nalunaarmat kinguartinneqarpoq.

Tullianilu ataatsimeersuarniarneranni nunamut namminermut naalakkersuisoqarfik Bentiaraq Ottosenimit siuttuuffigineqartoq aqutsisussaagaluarpoq.

Bentiaraq Ottosenili naalakkersuisutut siorna novembarimi tunuarpoq.

- Naalakkersuisut nikinneratigut aamma ataatsimeersuarnissaq taanna piviusunngunngitsoorluni. Ajoraluartumik, Per Ole Frederiksen oqarpoq.

Ataatsimeersuarnissarlu pisariaqavittoq, taanna isumaqarpoq.

Qaqugu tulliani ataatsimeersuartoqassanersoq suli nalunartoq 

KANUNUPE-mi sulineq piffissami kingullermi artornarmat, malittarisassanik nutarterisariaqarlutik Per Ole Frederiksen oqarpoq. 

Ingvar Motzfeldtillu tunuarnerata kingorna siulersuisut ataatsimeersuarnissamik aaqqissuussinissaq suliassani pingaarnerpaatikkaat, siulittaasuugallartoq oqarpoq.

- Siulersuisut uannut siulittaasunngortumut allaat piumasarivaat, sapinngisamik septembari naavallaartinnagu ingerlanneqarsinnaappat assorujussuaq nuannaarutissaassagaluartoq, Per Ole Frederiksen oqarpoq.

Maannali septembarinngorpoq, oqaluuserisassallu tusarniaassutigineqaqqaartussaallutik. Taamaammat septembarimiunaviarunanngitsoq, siulittaasuugallartoq isumaqarpoq.

- Sukkanerpaamik iliuuseqarnikkut oktobari anguneqartariaqassasoq qularnanngilaq. Kisianni aporfiit allallu takusariikkagut eqqarsaatigalugit kingusinnerulaarsinnaavoq, KANUNUPE-p siulittaasorigallagaa, Per Ole Frederiksen, oqarpoq.

KNR-ip Ingvar Motzfeldt attaveqarfiginiaraluarpaa, iluatsinnaguli.