Ane Hansen: Kangaatsiaq nutaamik atuarfittaassaaq

Namminersorlutik Oqartussat tamakkiisumik aningaasaliinianngikkaluarpataluunniit Kangaatsiaq nutaamik atuarfittaassaaq. Taama Kommune Qeqertalimmi borgmesteri, Ane Hansen Inuit Ataqatigiinnersooq, naqissuusiivoq.
Assimi takuneqarsinnaavoq Kangaatsiami atuarfiup ilaa oqummat matoqqatinneqartoq. Assi © : Privat
Allattoq Kathrine Kruse
septembarip 14-at 2018 13:33

- Kommunalbestyrelsip tamarmiusup naqissuseqqiinnarpaa atuarfiliassaq suliaralugu ingerlatiinnassagipput. Neriulluta suli Namminersorlutik Oqartussat aningaasaliissutissatut neriorsuutigisimasatik naammassissagaat, Ane Hansen oqarpoq.

Inatsisartullu aningaasaliissuteqaqqinngippata kommuni aningaasaliinissaminut piareersimavoq.

- Taanna periareersimaffigivarput aamma. Taanna imatut isumaqartariaqassaaq pilersaarutigut allat kinguaallatsinneqartariaqartut. Meeqqat atuarfimmi atugarliornerat isiginnaaginnarsinnaannginnatsigu, Ane Hansen oqarpoq.

Tamannalu pivoq angajoqqaat meeqqaminnik atuarfimmut ilaatigut oqummik eqqugaasimasumut atuariartortitsisarnerminnik naammagiliimmata. Angajoqqaammi Kangaatsiami atuarfiliassaq suli aallartinneqanngitsoq naammagilerlugu meeqqatik ataasinngornermi, marlunngornermi aamma pingasunngornermi atuariartortinngilaat.

AAMMA ATUARUK Angajoqqaat akerliullutik meeqqatik atuariartortinngikkaat

Tamannalu tunngavigalugu Kommune Qeqertalimmi kommunalbestyrelsi immikkut pingasunngornermi ataatsimiippoq.

Immikkullu ataatsimiinnermi borgmesterip Kangaatsiap atuarfiani suliniutit killiffiat saqqummiuppaa.

Ane Hansenip ilisimatitsissutigaa Kommune Qeqertalik illuliassanik titartaasartunut attaveqareersimasoq Kangaatsiami atuarfissamut titartaatitsiniarluni. Kommunimiillu neriuutigineqarpoq atuarfimmik nutaamik sananeq aappaagu sanaartorneq nutaaq aallarteriarpat aallartinneqarsinnaasoq.

Namminersorlutik Oqartussat Kangaatsiami atuarfimmik nutaamik sananissaq ingerlakkaluarpaat. Namminersorlutilli Oqartussat ininik atuartitsiviusunik nutaanik sisamanik sananiarluni pilersaaruteqalermat kommunip atuarfimmut suliassaq tamakkiisoq tigujumavaa.

Namminersorlutik Oqartussani naatsorsuutigineqarpoq Kommune Qeqertaliup sanaartornissamut aningaasaliussat ilanngullugit suliassaq septembarip ingerlanerani tamaat tigujumaaraa.

AAMMA ATUARUK Angajoqqaat atuartuutiminnik angerlarsimatitsiniarlutik sioorasaarisut