Angajoqqaat akerliullutik meeqqatik atuariartortinngikkaat
(Nutartigaq, sisamanngorneq nalunaaqutaq 14:52: Kangaatsiami atuarfik naapertorlugu atuartut amerlanersaat sisamanngornermi atuariartorput, aaqq.)
Atuartunit 95-init marluinnaat ataasinngornermi atuariartorput. Atuartullu 16-it pingasunngormat atuariartorput.
Kangaatsiami atuarfik oqummik eqqugaasimavoq, atuarfiullu ilaa ullumikkut matoqqatinneqarpoq. Angajoqqaallu aamma isumaqarput atuarfik peqqissutsikkut illersorneqarsinnaanngitsoq.
Kangaatsiami atuarfissaq nutaaq 2019-imut aningaasanut inatsisissami eqqaaneqarsimanngimmat angajoqqaat nalornissutigileqqavaat. Suliassarli 2018-imi aningaasanut inatsimmi ilanngunneqarsimagaluarpoq.
Angajoqqaallu pisortanit ersarissumik ilisimatinneqaqqaartigatik meeqqatik atuariartorteqqikkusunngilaat.
- Oqummik eqqugaaqqavoq atuarfik. Immaqa ukiuni qulit tungaanut ingerlasuni. Atuarfillu peqqinnanngitsoq meeqqatta ornittuagaat naammagiunnaarlugu atuartuutigut taamatut angerlartikkallarnikuuagut takussaasumik iliuuseqartoqanngippat oqartussaasunit imaluunniit pisussaasunit. Tamanna ajuusaarnartorujuungaluarpoq. Kisianni tassa tassunga killeqqavugut, atuartunut pingasunut angajoqqaaq, pissutsinillu naammagiliisoq, Pavia Martinsen oqarpoq.
AAMMA ATUARUK Angajoqqaat atuartuutiminnik angerlarsimatitsiniarlutik sioorasaarisut
Atuartussaatitaaneq pillugu inatsit unioqqutinneqartoq
Kangaatsiami atuarfiup pisortaanera, Sussi Adelholm, ilisimatitsivoq angajoqqaanik marlunngornermi unnukkut ataatsimiititsisimalluni.
- Ippassaq unnukkut uanga angajoqqaanik ataatsimiisitsivunga atuarfiup pisortaatut. Angajoqqaat ilisimatinniarlugit atuartussaatitaaneq pillugu inatsit unioqqutimmassuk. Atuartitsivigineqartullu aamma maani illersornartumik inissisimmata. Atuariartorfissaqarput, taakkualu oqummik eqqugaaqqanngillat, Sussi Adelholm oqarpoq.
2018-imut aningaasanut inatsimmi ima allassimasoqarpoq:
Qassiarsummi atuarfimmik/atuartut angerlarsimaffianik, Alluitsup Paami atuarfimmik aamma Kangaatsiami atuarfimmik sanaartornissanik pilersaarutit tassaapput pilersaarutit maannakkut aallartinneqarnikut imaluunniit pilersaarusiorneqartut, taamaammat taakkua Namminersorlutik Oqartussanit nanginneqarnissaat naammassineqarnissaallu illuatungeriinnit isumaqatigiissutigineqarpoq.
Kommune Qeqertalimmiilli aasap ingerlanerani paasineqarpoq Namminersorlutik Oqartussat suliaq annikillisissimagaat, taamaalilluni init atuartitsiviusussat sisamat kisiisa sananeqartussanngorlugit atuarfiup pisoqartaani. Tamannalu ilinniartitaanermut naalakkersuisup, Vivian Motzfeldtip KNR-imi ataasinngornermi illuatungilinngilaa, ilisimatitsissutigaluguli kommunip suliassaq tigussagaa isumaqatigiissutigineqarsimasoq.
Naatsorsuutigineqarpoq Kommune Qeqertaliup suliassaq septembarip ingerlanerani tigussagaa. Kommune Qeqertaliullu borgmesteriata, Ane Hansenip, KNR-imut tallimanngormat oqaatigaa Namminersorlutik Oqartussat atuarfissaq nutaaq tamaat akilertariaqaraa.
Kangaatsiami atuarfik 95-inik atuartoqartoqarluni 24-nik sulisoqarpoq.
