Angajoqqaat atuartuutiminnik angerlarsimatitsiniarlutik sioorasaarisut
Atuartummi atuarfiup pisoqaanertaani, Qullissani atuarfiusimasumi, atuartinneqartarsimasut Kangaatsiami sumiiffinni assigiinngitsuni maanna atuartinneqartarput atuarfiup ilassutissaatut pilersaarutip suliarineqarnerani.
Angajoqqaallu atuartuutillit atuarfiup ilassutissaatut pilersaarutit aningaasanut inatsisissami 2019-imoortumi eqqaaneqarsimanngimmata eqqumiigivaat, pilersaarutimmi aningaasanut inatsimmi 2017-imoortumi ilaatinneqarsimammata. Tassanilu nalunaarutigineqarpoq Namminersorlutik Oqartussat aamma Kommune Qeqertallip isumaqatigiissutigisimagaat suliassaq Namminersorlutik Oqartussat naammassissagaat.
Taamaattumik angajoqqaat Kangaatsiami atuarfiup ilassutissaatut pilersaarutinik qanittumi paasitinneqanngikkunik meeqqatik ataasinngornermi septembarip qulinganit atuariartortinniarnagit sioorasaaruteqarput.
- Atuartut sapigallit atugaat ajorsiartuinnassanngippata, sapigallillu amerliartuinnassanngippata, atuarfeqarnermilu atuartut peqqinnartumik toqqissisimanartumillu avatangiiseqarlutik atuartinneqarnissaat eqquutsinneqassappat, atuarfiup oquttup ilassutissaa sananeqartariaqartoq piumasaraarput, taama angajoqqaat aamma Kangaatsiami innuttaasut 123-t angajoqqaat atuarfiup ilassutissaanut nutaamut piumaqasaqarlutik allagaqaataannut tapersiillutik atsiorput.
Kommune Qeqertaliup suliassaq nangileraa
Ilinniartitaanermut, Kultureqarnermut, Ilageeqarnermullu Naalakkersuisoqarfimmit KNR-imut mailikkut uppernarsarneqarpoq Namminersorlutik Oqartussat aamma Kommune Qeqertaliup isumaqatigiissutigisimagaat Kangaatsiami atuarfiup ilassutissaa nutaaq Namminersorlutik Oqartussat aningaasanut inatsimmit 2018-imoortumit aningaasaliiffigalugu naammassissagaa.
Naalakkersuisoqarfilli aamma Kommune Qeqertalik aasap ingerlanerani allatut isumaqatigiissuteqarsimapput.
- Kommune Qeqertalimmit kissaateqartoqareerneratigut isumaqatigiissutigineqarpoq Kommune Qeqertaliup suliassaq tamakkiisoq Namminersorlutik Oqartussanit tigussagaa. Suliassallu tunniunneqarnissaa aningaasanik malitseqartussaq septembarip ingerlanerani naammassineqassasoq naatsorsuutigineqarpoq, taama Ilinniartitaanermut, Kultureqarnermut, Ilageeqarnermullu Naalakkersuisoqarfik nalunaaruteqarpoq.
Kangaatsiap Atuarfia 95-inik atuartoqarluni 24-nik sulisoqarpoq.