Kangaatsiaq: Atuartut atuarfittaassartik qilanaarigaat
![](/sites/default/files/styles/image_934x467/public/article_images/kevin_lundblad_iversen.jpg?itok=1Ij4h_Wy)
Kangaatsiami atuarfissaq nutaaq suli sanaartorneqarpoq.
Atuarfiup pisoqartaa oquttoq matuneqarmalli atuartut illoqarfimmi sumiiffinnut assigiinngitsunut naammagittarlutik atuartortarput.
Tamannalu ilaatigut ilungersuatitsisarsimavoq.
- Atuarfipput nutaanngippoq inikilliornarlunilu inillu atuartitsiviusut amigarlutik. Neriuppunga atuarfimmi nutaami init atuartitsiviusussat naammattut pigineqarumaartut, aamma atuarfiup naammassinissaa erininarpoq, Kevin Lundblad Iversen, Kangaatsiami meeqqat atuarfinni atuartoq, taama oqarpoq.
Atuarfiummi pioreersup saniani atuarfik nutaaq maanna sananeqaleruttorpoq. Tamannalu meeqqanut 70-init amerlanerusunit angajoqqaanit sukataarutigineqarnikuuvoq. Ilaatigut ukiut pingasut matuma meeqqaminnik atuariartortitsinatik angerlarsimatitsinerisigut.
Taamaammat Kevin Lundblad Iversen atuaqataalu atuarfittaassamut nutaamut, aappaagu juunimi piareertussamut, kisimik qilanaartuunngillat.
AAMMA ATUARUK Angajoqqaat akerliullutik meeqqatik atuariartortinngikkaat
- Atuarfissarsuaq piareeriartortoq malinnaavigaarput. Soorunami meeqqatuulli qilanaarpugut, Søren Brønlund, Kangaatsiami angajoqqaat sinniisaanni siulittaasoq, taama oqarpoq.
Atuarfiup pisoqaanersaa oqummat ukiuni arlalinni matoqqatinneqarnikuuvoq, taamaattumillu meeqqat Kangaatsiami sumiiffinni assigiinngitsuni atuartinneqartarput.
- Kisianni silap kissannera anorilu allallu peqqutaallutik sullivitsinnut annguttarpoq, kisianni init taakkua atuartitsiviunngillat, Sussi Adelholm, Kangaatsiap Atuarfiani pisortaq, taama oqarpoq.
Atuarfitoqqamilu oquk ajornarsiutaalermat atuarfittaarnissaq angajoqqaanit sukataarutigineqarsimavoq.
AAMMA ATUARUK Kangaatsiaq nutaamik atuarfittaassaaq
- Meeqqatta peqqissuunissaat sorsuutiginikuuarput, aamma atuarfittaarniarnitsinnut tamanna pingaarnerpaajunikuuvoq. Meeqqat avatangiisaat peqqissuunissaanut tunngaveqarluinnarami aamma meeqqat avatangiiserissaarnissaat atuarfeqarnermi inatsisini allaqqavoq, Søren Brønlund oqarpoq.
Atuarfik 70-it sinnerlugit atuartoqartoq 14-inik ilinniartitsisoqarpoq.
Oquulli ajornartorsiutaanera pissutigalugu aalaakkaasunik ilinniartitsisussaqarniarneq ajornartorsiutaasimavoq
- Suliffissatut ornigineqarpallaartanngilaq. Ilinniartitsissutigut taarseraaffiulaartorujuuvoq, ilaatigut atorfinittut sapertaramikku, peqqissutertillu illersorusullugu suliffigiinnarsinnaanagu. Ilimagilluinnarparalu atuarfik orniginartinneqassasoq atuarfik una kusanaqigami, pissutsinut malinnaangaatsiartumik atuarfittaartussanngorlatta, Sussi Adelholm oqarpoq.
AAMMA ATUARUK Angajoqqaat akerliullutik meeqqatik atuariartortinngikkaat
Taamaammat Kevin Lundblad Iversenip nutaamik atuarfittaarunik aamma neriuutigaa aalaakkaanerusumik ilinniartitsisoqalerumaarlutik.
- Neriuppunga ilinniartitsisut sungiusimanerusagut nikerassanngitsut, Kevin Lundblad Iversen oqarpoq.
Kangaatsiami atuarfik nutaaq katillugu 65 million koruuninik akeqassaaq. Kommune Qeqertalik aningaasaliisuusoq Namminersorlutik Oqartussat 13,4 million koruuninik tapiissuteqarpoq.
KJ Greenland A/S atuarfimmik nutaamik sanaartortuuvoq.
Naqqiut 7. september 2021, nal. 09.02: Atuartut biologimi aamma fysikkimi atuartinneqartarsimannginnerannut ilanngussarput peerparput atuarfimmit ilisimatitsissutigineqarpat fagini pineqartuni atuartitsisoqartartoq.