Kangaatsiap Atuarfiata ilaa ingutserneqartoq
- Qisuariaatsit soorlu imaapput: Kiisami, qujanaqaaruna aallartittoq, piviusunngortoq. Ingutserneqarnera aallartimmat piviusunngorlunilu qujamasuttorujussuupput, Sussi Adelholm oqarpoq.
Atuarfiup ilaata oqoqarnera naammagittaalliutigineqartarsimaqaaq. Ilaatigut angajoqqaat akerliullutik meeqqatik siorna atuariartortinngilaat.
AAMMA ATUARUK Angajoqqaat akerliullutik meeqqatik atuariartortinngikkaat
Atuarfiup oquffiusortaata ingutserneqarnissaa angajoqqaat ukiuni arlalinni kissaatigisimagaat, Sussi Adelholm oqarpoq.
Taassumalu ilanngullugu oqaatigaa oquk aamma sulisunut akornutaasarsimasoq.
- Ingutserneqarluni aallartimmat, aamma ilinniartitsisut sulisullu qujapput. Oqummik eqqugaaqqanera matoqqagaluarluni, sualummik upernaakkut aput aannerani tipi imaluunniit silaannaq inuunilunnartorujussuaq takkuttarami sulisunut peqqinnarpallaanngilaq, Sussi Adelholm oqarpoq.
Atuarfiup oquffiusortaata ingutserineqarnerata ukiup atuarfiusussap aallartinnginnerani naammassineqareersimanissaa naatsorsuutigineqartoq, Sussi Adelholm oqarpoq.
AAMMA ATUARUK Kangaatsiaq nutaamik atuarfittaassaaq
Atuarfiulli pisoqartaa ukiuni tallimani kingullerni atorneqarsimanngitsoq taassuma paasissutissiissutigaa. Taamaammat atuartut illoqarfimmi inini allani atuartinneqartareerput, atuarfillu Majoriap illuutaani ininik attartugaqarsimavoq.
- Atuarfittaarnissatta tungaanut taakkua artuartitsivittut atorallassavagut, Sussi Adelholm oqarpoq.
Atuartullu anginerit tassunga atuariartortarallassapput.
Atuarfissap nutaap ukiut pingasut missaat qaangiuppat atuartitsiffiusinnaalernissaa naatsorsuutigineqartoq politikkikkullu suliaq ingerlalluartoq Kommune Qeqertallip ataatsimiititaliaani Inoqarfimmi siulittaasup, Hans Aronsenip (IA) paasissutissiissutigaa.
AAMMA ATUARUK Namminersorlutik Oqartussat Kangaatsiami atuarfimmut nutaamut aningaasaliisariaqartut
- Taamaasillunilu suliaq naatsorsuutigineqartutut 2021-mi naammassissalluni. 2022-kkunnilu tunniunneqarnissaa ilimanartupilussuulluni. 2021-mi tunniunneqariataanngikkuni, Hans Aronsen oqarpoq.
Atuarfittaassaq 65 millionit koruunit missaannik akeqassaaq.
Namminersorlutik Oqartussat atuarfimmut sanaartornissamut 13 millionit koruuninik immikkoortitsereerput. Sulili amerlanerusunik aningaasaliisinnaanissaat pillugu Kommune Qeqertalimmeersut Namminersorlutik Oqartussaneersullu oqaloqatigiittut, Hans Aronsen paasissutissiivoq.
