Namminersorlutik Oqartussat Kangaatsiami atuarfimmut nutaamut aningaasaliisariaqartut
Tamanna partiit aningaasanut inatsisissamik aappaagumut atuuttussamut isumaqatigiissuteqartut ammaffigivaat. Partii Nalerarli isumaqarpoq Namminersorlutik Oqartussat atuarfiliorneq tamaat akilertariaqaraluaraat.
Kangaatsiami atuarfiup ilaa oqoqarmat matoqqatinneqarpoq, angajoqqaallu meeqqamik atugaat akerleralugit, atuartuutiminnik ukiaq manna ulluni pingasuni angerlarsimatitsipput.
- Uani peqqissutsikkut illersorniarlugit taamatut iliuuseqarniarpugut, Angajoqqaat ilaat, Lars- Frederik Berthelsen, taamani taama oqarpoq.
Kangaatsiarlu nutaamik atuarfittaassasoq Kommune Qeqertalimmit angajoqqaanut ukiarmi neriorsuutigineqarpoq.
- Atuarfimmik nutaavimmik sananiarluta pilersaarusiorpugut, Borgmester Ane Hansen oqarpoq.
AAMMA ATUARUK Kangaatsiaq nutaamik atuarfittaassaaq
Namminersorlutik Oqartussanillu Kommune Qeqertalik Kangaatsiami nutaamik atuarfimmik sanaartornermini aningaasaqarnermigut imminut artukkissagaluarpat kommuninut tapiissutissat siumut tunniunneqarsinnaasut maanna ammaffigineqalerpoq.
Taama iliornissaq aningaasanut inatsisissaq pillugu isumaqatigiissuteqartut, tassalu Siumup, Atassutip, Nunatta Qitornaasa, Demokraatit aamma Inuit Ataqatigiit, akuersissutigaat.
Tamannali Partii Naleqqap akerleraa:
- Piviusoq atorneqarsimanngilaq. Maannakkummi suliarineqarnissaanut 50 million pallillugit akeqartussanngortoq kommuninut ataatsimoortumik tapiissutinik tunniussisarnernut aningaasat aaginnarneqarnissaat Partii Naleqqaminngaanniit akuerisinnaanngilluinnaqqinnaarlugu aningaasanut inatsisissamut oqariartuutigivarput, Jens Napaattooq, Partii Naleraq, taama oqarpoq
Kommunilli atuarfinnik atualersussanullu neqeroorutinut sanaartornissamut 2018-ip aallartinneraniit akisussaalerput. Tamatumunnga atatillugu kommuninut ataaatsimoortumik tapiissutit katillugit 90 millionit koruuninik amerlineqarput.
Aningaasaqarnermut Naalakkersuisoq Vittus Qujaukitsoq, KNR-imut ilanngullugu ilisimatitsivoq, Kommune Qeqertalik aningaasaqarnermut inatsisissaq aappaagumoortoq suliarineqarmat ilisimatitsisimasoq Kangaatsiami atuarfissaq kommunimit tamakkiisumik nammineq aningaasalersorneqarniartoq.
AAMMA ATUARUK Angajoqqaat akerliullutik meeqqatik atuariartortinngikkaat
