Kangaatsiami atuarfittaassaq napparnersiorneqartoq
Kangaatsiami atuarfittaassaliortoqaleruttorpoq.
Kommune Qeqertaliup atuarfittaassaq atuartunit ilinniartitsisunillu aappaagu juunimi iserterfigineqarsinnaassangatippaa.
AAMMA ATUARUK Kangaatsiap Atuarfiata ilaa ingutserneqartoq
Atuarfitoqanngortussarmi oqummat qilanaaqaat. Angajoqqaarpaaluillu atuarfitoqanngortussaq peqqinnanngimmat qitornatik 2018-imi atuartikkumajunnaarpaat.
Atuarfitoqanngortussap ilaa ullumi ingutserneqarmat millivoq, atuartullu 74-it tassaniissinnaapput.
Assi: Atuarfitoqanngortussap ilaa ingutserneqareersorlu ima isikkoqarpoq.
Atuarfittaassaaq sapaatit akunneranni uani napparnersiorneqarmat, pølseqarlunilu sodavandeqarpoq.
Kangaatsiap Atuarfiata pisortaanera, Sussi Adelholm, atuarfittaassamut aappaagu iserternissaminnut qilanaarpoq.
- Neriuuteqaqaanga. Ukiorpassuarni qilanaarisarput atuarfissarput piviusunngulernera uppernarseqqipparput, taanna oqarpoq.
- Atuarfimmi taqqoukiorpassuarni atugarliornikuugatta, tattoqilluta. Avissaaqqalaartariaqartarluta. Ukiumiit ukiumut allanngortitsisariaqartarluta, naammagittangaarluta ukiorpassuarni. Massakkut ukiut arfinillit arfineq-marluk tungaanut taama ingerlagatta, taanna oqarpoq.
Atuarfimmi nutaggarimmi pinngortitalerinermillu atuartitsisalernissani qilanaarinerpaasaata ilagaat.
- Qilanaarinerpaasatta ilagivaat, pinngortitalerinermi naturfagini allanilu pinngortitaq qanimut atorluarlugu atuartitseriaatsit periafissaqalissammata, Sussi Adelholm oqarpoq.
AAMMA ATUARUK Angajoqqaat atuartuutiminnik angerlarsimatitsiniarlutik sioorasaarisut
Kommune Qeqertaliup borgmesteria, Ane Hansen (IA), Kangaatsiami napparnersiornermi oqalugiarluni aamma najuuppoq.
Atuarfiup nutarterneqarnissaa Namminersorlutik Oqartussat akisussaaffiginikuuaat, klassilli atuartitsiviusussat sisamaannaat akissaqartinneqartut nalunaarutigimmassuk suliniut kommunip tamakkiisumik tiguaa, atuarfittaassamillu sananissaq siunniunneqarpoq.
Namminersorlutik Oqartussammi aningaasat atuarfiliornissamut immikkoortissimasai 13,4 millionit koruuniinnaammata nutaggarimmik atuarfiliornissamut naammaqqajanngillat.
- Isumaqarpunga aalajangerneq tulluusimaarutissaasoq ullumikkut. Isiginnaaginnarata pissutsinut akuliussimagatta, Ane Hansen oqarpoq.
Atuarfiliorneq 65 millionit koruunit missaannik aningaasartuuteqarfiussangatinneqarpoq.
13,4 millionit koruunit Kommune Qeqertalimmut Namminersorlutik Oqartussanit tunniunneqassasut aningaasartuutillu sinneri kommunip akilissagai isumaqatigiissutaavoq.
KJ Greenland A/S atuarfiliortuuvoq.