Kalistat Lund: Innaallagissiutit nutarternissaat ukiuni qaninnerpaani aallartittariaqarpoq
Nuuk siorna novembarip ulluisa 29-annit akunnerni 18-it angullugit sarfaqanngilaq.
- Taama pisoqaqqinnginnissaa isumannaarneqartariaqarpoq, Kalistat Lund oqarpoq.
Taamali isumannaarissagaanni ajornartoornermi sarfaliuuteqarnermi nutarterisoqartariaqarpoq.
Nuummi ajornartoornermi sarfaliuutit marluk ukiunik 50-init amerlanerusunik pisoqaassuseqarput. Taakkulu isumalluutaaginnarsinnaanngillat.
AAMMA ATUARUK Nukissiorfiit Nuuk pillugu: Illoqarfiup ineriartornera nukissiuutinik pilersuinermut artukkiisoq
Tamanna Nukissiorfiit Nuummi sarfaarunnermi pisunut nassuiaataanni qanittukkut saqqummersinneqartumi atuarneqarsinnaavoq.
Nukissiorfiit Ea Energianalyse A/S-ip 2018-imi nalunaarusiaanut innersuussipput. Ajornartoornermi sarfaliuutit innaallagiamik qaminneqarsinnaanngitsumik atuinermik 2030-mi naammattumik sarfalersuisinnaanngitsut tassani allassimavoq.
Kalistat Lundillu tamanna ilisimavaa.
- Ukiuni qaninnerpaani nutarterineq aallartinneqassasoq isumaqarpunga.
Maannali aatsaat misissuisoqaleruttorpoq.
Ilaatigut inoqarfiit allat sarfamik pilersuinerisa qanoq nutarteriffigineqartariaqartiginerat Naalakkersuisut paaserusuppaat.
AAMMA ATUARUK Nukissiorfiit aningaasanik pisariaqartitsivoq qulakkeerinnittariaqarporli
Aamma qanoq aningaasaliiffigineqarnissaat misissorneqarpoq.
- Nukissiorfiit aningaasatigut inissisimanerat maannakkut misissorneqarpoq. Aammalu siunissami innaallagissiutit ingattamik ukua pissamaataasut eqqarsaatigalugit nutarsarneqarnissaasa qanoq aningaasalersorneqarnissaat maannakkut nalilersorneqarlutik ingerlanneqalerput.
Taamaammat sarfamik pilersuinermik nutarterinissaq qanoq akeqassanersoq maanna paasissutissiissutigisinnaanngilaa.
- Kisianni nalunngilarput akisoorujussuusussaavoq, Kalistat Lund oqarpoq.