Kalaalllit Nunaat Parisimi isumaqatigiissummut aqagu ilaalissaaq

Nunalerinermut, imminut pilersornermut, nukissiutinut avatangiisinullu naalakkersuisoq, Kalistat Lund, danskillu ineriartortitsinermi suleqatigiinnermut nunarsuarmilu silap pissusia pillugu politikkimut ministeriat, Dan Jørgensen, nunatta nunat tamalaat silap pissusia pillugu isumaqatigiissutaannut ilaalernissaanut atsioqatigiissappput.

Allattoq Ivik Kristiansen

juunip 19-at 2024 12:19

Nunarput Parisimi isumaqatigiissummut ilaalissaaq. Naalagaaffiit Peqatigiit silap pissusianut allattoqarfiata pisortaa, Simon Stiell, taama nalunaarfigineqassaaq, naalakkersuisoq Kalistat Lund danskillu ministeriat Dan Jørgensen aqagu atsioqatigeereerpata.

Naalakkersuisut tusagassiorfinnut taama nalunaaruteqarput.

PARISIMI ISUMAQATIGIISSUT

Nunarsuup kiatsikkiartornerata killilersimaarnissaa Parisimi isumaqatigiissummi anguniagaavoq.

Nunat 200-t missaat CO₂-mik aniatitsinermik killilersimaarinninnissamik isumaqatigiissummi tassani atsioqataapput.

Isumaqatigiissut taanna Frankrigip illoqarfiisa pingaarnersaanni, Parisimi, 2015-imi atuutilerpoq.

Nunarsuup kiatsikkiartornerata annerpaamik 2 gradinut, sapinngisamillu 1,5 gradimut, killilersimaarnissaa isumaqatigiissummi tassani anguniagaavoq.

Allisiguk

Nunarput nunat tamalaat Naalagaaffiit Peqatigiit silap pissusia pillugu 2015-imi ataatsimeeersuarneranni isumaqatigiissutaannut ilaaniarnani taamani aalajangerpoq. Nunattali isumaqatigiissummut ilaalernissaa Inatsisartut 2023-mi ukiakkut ataatsimiinnerminni akuersissutigaat.

Aamma atuarukIlisimatusartoq Parisimi isumaqatigiissummut tunngatillugu: Umiatsiaaqqat innaallagiartortunik aquuteralalersoqquneqarallarunnanngillat

Naalakkersuisut danskillu naalakkersuisuisa suleqatigiinnissamut isumaqatigiissut nutartigaq Nuummi aqagu sisamanngornermi atsioreerpassuk, nunarput isumaqatigiisssummut ilaalissaaq.

- Naalakkersuisut aamma danskit naalakkersuisuisa akornanni suleqatigiinnissamut isumaqatigiissut nutartigaq piviusunut nutaanut, Kalaallit Nunaata Danmarkillu marluullutik Parisimi ilaalerfigisaannut naapertuuppoq, Kalistat Lund tusagassiorfinnut nalunaarummi oqarpoq.

- Suleqatigiinnissamut isumaqatigiissummi Kalaallit Nunaata aamma Danmarkip akornanni naligiinnermut ataqqeqatigiinnermullu tunngavissat tunngavigineqarput. Maanna – Naalakkersuisut sinnerlugit – suleqatigiinnissamut isumaqatigiissutip nutarterneratigut Kalaallit Nunaata Parisimi isumaqatigiissummut ilaalernera pillugu nalunaaruteqarnissamut Inatsisartut aalajangiinerat piviusunngortissinnaagakku tulluusimaarutigaara, Kalistat Lund oqarpoq.

Aamma atuarukImmikkut ilisimasalik Parisimi isumaqatigiissut pillugu: Nunarput ilanngunnikkut nunani tamalaani ersarinnerulissaaq

Nunatta Parisimi isumaqatigiisssummut ilaalernissaa aamma Dan Jørgensenip nuannaarutigaa.

- Kalaallit Nunaata Parisimi isumaqatigiissummut maanna ilaalernera, taamaalillutalu ataatsimoorluta silap pissusiata allannguutaanut suliniutinik annertusititsisinnaalernerput nutaarsiassaavoq nuannerluinnartoq. Parisimi isumaqatigiissummi ataatsimoorsinnaalernerput alloriarnerujussuuvoq, Kalaallit Nunaannuinnaanngitsoq, aammali Kunngeqarfimmut, Dan Jørgensen oqarpoq.