Kalaallit qimmii pillugit atuakkiortoq
Aataap ernuttani Anori qimussernermik ilinniartikkaa atuakkami oqaluttuaavoq. Aamma qimmip qimuttup ineriartornera, soorlu nerisaqarnera, pissusaa qanorlu paarineqarnissaa tassani sammineqarput.
Navarana Lennert kemiimik matematikkimillu ilinniartitsisutut nuummi ilinniakkani naammassileruttorpaa.
Angutaata meeraaneraniilli qimussernermik piniarnermillu ilinniartissimavaa taamaammallu qimusserneq Sisimiuniikkaangami ulluinnarsiutigalugu.
Nuummiikkamili ernini qimussernermik ilinniartissinnaanngilaa.
AAMMA ATUARUK Ny børne-fagbog om slædehunde på vej
AAMMA ATUARUK Forskere rejser med til Avannaata Qimussersua
- Sisimiuniikkaluarutta qimminukariaannaalluta qimmit qamutillu takutissorlugit, kisianni nuummi tamakkoqanngeriarmat atuakkiornissara assut pilerigilerpara, Navarana Lennert oqarpoq.
Atuagaq tallimaniit ukiulinnut saaffiginnippoq Christian Rexillu titartagaanik assiliartalersorneqassalluni.
Qimmit ilaatigut sikuerukkaluttuinnarnera pissutigalugu ikiliartorput. Qimussertarnerup tammatsaaliornissaa pingaaruteqarpoq, soorlu atuakkiornikkut tamanna anguneqarsinnaasoq, Navarana Lennert oqarpoq:
- Arlaatigut iliuuseqarutta tammarnavianngillat.
Aamma qimusserneq pillugu oqaatsit tammatsaaliorneqarnissaat Navarana Lennertip pingaartippaa. Taamaammallu taaguutit qimussernermut tunngasut, Sisimiuni ilitsoqqussani, atuakkami sammivai.
- Assersuutigalugu oqaaseq 'ingoraq', oqaaseq taanna imaqartorujussuuvoq suliarujussuaq. Taamaammat meeqqanut ingerlateqqinnissaa aamma pingaaruteqarpoq.
Navarana Lennert qimmit qimuttut pillugit ilisimatusarfiup suliniutaani "QIMMEQ"-mi ikiortaavoq. Siunissami qimminik qimuttoqaannarnissaa suliniummi qulakkeerniarneqarpoq.
Inuusuttut qimussernermik ilaatigut ima soqutiginnilersinneqarsinnaasorai:
AAMMA ATUARUK Knud Rasmussenip katersai misissorneqassapput
AAMMA ATUARUK Slædehunde har forskellige gener i øst og vest
- Inuusuttuaqqat soqutiginninnerulernissaat anguniarlugu assersuutigalugu GoPromik filmiliorujoorsinnaavugut. Sunaluunniit atorneqarsinnaassaaq filmiaqqanik takutitsisaqattaarluni. Taava imaassinnaavoq qimusserneq misilikkusulersinnaagaat, qimussertartoq Navarana Lennert oqarpoq.
Atuagaq "Aataa Anorilu" ukiaru saqqummissasoq Navarana Lennertip naatsorsuutigaa.
Navarana Lennertip qimussernermini videoliaa uani takuuk.
