Kalaallit Nunaat Tivolimiinnissaanut piareersarneq aallartittoq
Assinik saqqummersitsisoqassaaq, saqqummiisoqassaaq, timersornermik takutitsineq tusarnaartitsinerillu, ilaatigut Julie Berthelsen aamma Rasmus Lyberth tusarnaartitsissapput, Kalaallit Nunaat Tivolimi pisarneq malillugu juulip 31-ani aggustillu aallaqqaataani ingerlanneqalerpat.
Pilersaarutit maanna naammassisut ilaatigut imatut imaqarput, Sermersuup ilisimatusarfigineqarnera pillugu saqqummiineq, kalaaliulluni kuultinik saffiortutut sulineq pillugu saqqummiineq, taallanik atuaaneq aamma timersortartut naammassisaannik nersuineq.
Tamatuma saniatigut pilkersaarummi nipilersortussarpassuupput. Julie Berthelsen Rasmus Lyberthillu saniatigut Uummannameersut Uummannarmiuaqqat, Kamik, Naneruaq aamma nipilersortartoq René Brandt tusarnaarneqarsinnaassapput.
Kim Falck-Petersen peqatigiiffik Kalaallit Nunaat Tivolimi siulittaasuusoq, aaqqissuussamut akisussaasuusoq, ukiup tulliani Grønland i Tivoleqarnissaanut aaqqissuussaq ukioq manna pisussaq misigutaannaanersoq aperigaanni.
- Sapinngisarput tamaat ukioq manna suliaqarpugut ukiumut tullermut pilersaarutitta qanoq ittussaanerinut takussutissiiumalluta – tassanilu ukiuni 50-ini nalliuttorsiortussaavugut. Taamaattumik pingaarnerutipparput ukiumi tullermi nalliuttorsiorneq annertuumik malunnartinneqarnissaa pillugu siumut misiliguteqalaarnissarput, taanna oqarpoq.
Tamatuma saniatigut aaqqissuussineq ukioq manna tallimanngornermi ingerlanneqassaaq pisarnerlu malillugu Tivolimi tallimanngorneq rockimik tusarnaartitsiffiusarpoq. Tassanilu peqatigiiffik aamma peqataasinnaanissamut periarfissaqarsimavoq, naak malittarisassat naapertorlugit tusarnaartitsisussaq danskit nipilersortartuineertussaagaluartoq.
- Tassani Tivoli suleqatigalugu TV-2 appisimaartittussanngorlugit isumaqatigiikkatta iluatsitseqaagut, Kim Falck-Petersen oqarpoq.
Pulaartut tuusintilikkuutaat
Tivolimi katerinnissamut ileqqoq 1976-imi aallartippoq, tassa nunatsinneersut inuusuttut Danmarkimut ilinniariartortut Tivolimi aggustip aallaqqaataani naapinnissaminnik isumaqatigiissimapput.
Ileqqoq taanna ullumikkut ilisimasatsinnut, tassa kalaallit kulturiannik Tivolimi ulluni marlunni malunnartitsisoqartalerluni 2001-imi nutarterneqarpoq.
Tivolimmi inuit 10.000-init 15.000-inut ulluni marlunni aaqqissuussinernut ornigunnissaat naatsorsuutigalugu, Tivolimi pisortap, Kasper Schumacherip siorna oqaatigaa. KNR-imut
- Ullut taakku pisoqarfiulluarput. Tamanna ornigarneqarluartarnitta nalinganiinneranik aammali Grønland i Tivolip aaqqissuunneqarneranut peqataaniartoqarneranik pissuteqarpoq. Taamaammat Tivolimi ulluni annerpaat ilagaat, taanna oqarpoq.
Ukioq manna immikkut ittumik siullerpaamik aggustip aallaqqaataani Nordatlantens Bryggemi nanginneq aaqqissuunneqassaaq, tassani DJ Liam nipilersornissamik akisussaasuuvoq. Aaqqissuussaq tamanut ammavoq.
