Kalaallit inuusuttut kultooriat Københavnimi festivalimi nutaami sammineqassasoq

Nallukattat Olsenerutit nerriviup qaavanni, kalaalimerngit nipilersuullu hiphopimit elektroniskimik nipilersorpalaartunut. Tamakkua Kalaallit Nunaata Isaa Festival (KNIFE) nutaaq Københavnimi kalaallit kulturiannik maajip arfineq-pingajuanni qulingiluaannilu saqqummiisoqarpat misigisassat ilagaat.

Nipilersortartut Tarrak aamma Tûtu tusarnaartitsissapput, eqqumiitsuliortullu Inuuteq Storch aamma Alberte Parnuuna saqqummersitsissapput.

Inunnguaq Hegelund - arlaleriarluni Kalaallit Nunaanni igasutut pissartanngoreersoq - kalaaliminernik sassaalliinissaminut iggavimmi piareersimassaaq.

Festivalimik aaqqissuussisut tassaapput kulturikkut attaveqatigiinnermik suliaqartoq nipilersortartorlu Aviaja Larsen, Københavnimi najugalik, assilianik eqqumiitsuliortoq aallarnisaasorlu David Hertling Péronard, Nuummeersoq.

Festivali ukiup aappaa avillugu matuma siorna pilersinneqariartuaalerpoq, Kalaallit Nunaata soqutigineqarnerulernera suliniuteqartut taakkua marluk malugimmassuk – pingaartumik USA-p præsidentiata Donald Trumpip nunamik tigusiniarsarinerata kingunerisaanik.

- Kalaallit Nunaat danskinit siornatigut misiginikuunngisannik alapernaattoqalerpoq. Taamaattoqalerneranilu pilersitsinissatsinnut piffissaq maanna eqqornerusinnaagunanngilaq, Aviaja Larsen Københavnimi Kalaallit Illuutaanni kulturikkut suliaqartartoq oqarpoq.

Nunarsuup sinneranut ingerlateqqikkusukkaa

Aviaja Larsen 35-nik ukiulik festivalimik taamaattumik pilersitsiniarluni ukiorpassuarni takorluugaqartarsimavoq.

Fynimi peroriartorpoq, arnaatalu kalaaliusup kalaallit kulturiata angerlarsimaffiannut ilaanissaa isumagaa. Aviaja Larsenip arnaata ilisimasat aamma siammarterpai, assersuutigalugu Aviajap atuaqataanut kalaaliminernik nassarluni Kalaallit Nunaat pillugu kalaallisoorluni oqalugiartarnermigut.

Aviaja Larsenili avatangiisinit isummiussereerfigineqarajuppoq.

- Nunagisannik oqaluttuarigaangama Kalaallit Nunaat pillugu nikassaasumik oqaaseqarfigineqartarpunga, tamannalu Kalaallit Nunaannut kalaallinulluunniit isiginnittaatsimut naleqqutinngilluinnarpoq, Aviaja Larsen oqaluttuarpoq.

20-leereerluni Nuummi ikinngutitaarami, taassumalu kalaallit inuusuttut kulturiat ilisaritimmagu, assigiinngitsunik pilersitsisarnerup silarsuaa paasilluarpaa.

- Kalaallit eqqumiitsuliortut, siornatigut misiginngisaannakkannik, tassanngaanaq avatangiiserilerpakka tamannalu nuannerluinnartuuvoq. Tamannalu nunarsuup sinneranut ingerlateqqikkusuppara, oqarpoq.

David Hertling Péronard festivalilioqatiginnikkumalluni ukiup aappaa avillugu matuma siorna sianermat, Aviaja Larsen ingerlaannaq akuersivoq.

- Sivisuumik taamaaliorusussimavunga, taanna oqaluttuarpoq.

Pisussarpassuarni siullersaasoq

Aviaja Larsenip David Hertling Péronadillu KNIFE ukiumoortumik festivaliusalernissaa neriuutigaat.

Inuit tusindilikkaat Kalaallit Nunaat Tivolimi aggustip aallaqqaataani ingerlanneqaraangat kalaallit kulturiat qitiutillugu ukiorpassuarni naapisimaartarput.

Aviaja Larsen, DJ-iusoq, Tivolimi siorna tusarnaartitsigami qittatsitsilluavippoq. Taassumap KNIFE inuusuttut kulturiannik immikkut sammisaqarfiusutut ilassutaanissaa neriuutigaa.

- Kalaallit Nunaanni inuusuttut kulturiat, nipilersoriaasiat eqqumiitsuliaallu pitsaanerpaat ilaat ujartorpagut. Soorunami neriuutigaarput suli allarpassuarnik ukiuni tulliuttuni ilanngussissalluta. Festivali ukiorpassuarni ingerlanneqartartussatut takorloorlugu pilersipparput, qungujulluni oqarpoq.

Aammattaaq unnuap tungaanut qittakkiarumasunut nutaarsiassatsialaqarpoq. Garagen Råhusetimi kingusinnerusukkut nuannatsitsilerpat Nuuk Københavnimi misigineqalaarsinnaassaaq. DJ Liam tassani nipilersussaaq.