Maniitsumi uliakoorneq: Uliap imaanut kuuttup annersaa suneqarsinnaanngilaq
Uuliap 10.000 literip missaaniittup imaanut kuuttup annersaa suneqarsinnaanngilaq. Nukissiorfiit paasissutissiipput uliap kuuttup annerpaartaa nunap iluanut kuussangatinneqartoq.
Qatserisartut oqarnerat naapertorlugu Maniitsumi tallimanngormat uliakoortoqarnera nakkutigineqarluarpoq.
Allattoq Jonna Enoksen Dahl
maajip 07-at 2026 11:30
Maniitsumi qatserisartut tallimanngormalli uliap imaanut kuunera sulissutigaat.
Tankit uliamik imallit, Nukissiorfiup innaallagissiorfiutaanut uliamik immersuisut, aqqutaasa ilaata milittoorsimanerata kingunerisaanik ulia illorsuup eqqaanut nunamut immamullu kuulertoq, Nukissiorfimmi Qeqqata Kommuniani aqutsisup Jan Zachariassenip nassuiaatigaa.
- Ruujori nunap iluaniittoq ussiillisimavoq. Taanna aappaqartinneqarluni qajannaaqqagaluarpoq.
Ingerlatsinermut pisortap oqaatigaa, ruujori ussiitsup iluarsarnissaa pillugu Nukissiorfiit atortussanik amigaateqartoq. Pingaartumik ruujorimik amigaateqarput.
Uliap 10 kubikmeteri missaaniittup, tassa 10.000 liiterip, imaanut kuuttup annersaa suneqarsinnaanngilaq. Uliallu kuuttup annerpaartaa nunap iluanut kuussangatinneqartoq, Nukissiorfimmiit oqaatigaat.
-Dieselolia 10.000 literit missaanniittoq kuussimasoq naatsorsuutigaarput. Takusinnaasarpullu naapertorlugu 2.500 literit aamma 3.000 literit akornanni katersorsimavagut. Tassa imaappoq ulia kubikmeterit arfineq marluk (7.000 literit aaqq.) qanoq pineqarsimanersoq nassuiarneqarsinnaanngitsoq.
Upalungaarsimanermik suliallit uliakoornermik tallimanngormat kalerrinneqaramik milluaatinik siaartiteripput, uliaakoorummulli immiivitsik ajutoorutigisimavaat.
Umiarsualiviullu eqqaani iluliaqarmat uliamik milluaanissaq aamma ajornakusoorsimavoq, Maniitsumi qatserisartut ulluinnarni aqutsisuat oqaluttuarpoq.
Aammattaaq umiarsualiviup eqqaani iluliaqarmat uliaanik katersinissaq ajornakusoorsimavoq, Maniitsumi qatserisartut aqutsisuata Jørgen Lyngep KNR-imut oqaatigaa.
Umiarsualiviup eqqaani Iluliaqarnera uliamik saliiniarnermut ajoqutaagaluartoq, uliakoorneq nakkutigineqarluarpoq, Jan Zachariassenip oqaatigaa.
- Uliakoorneq soorunami nakkutigaarput. Maniitsumilu qatserisartut upalungaarsimasullu suleqatigilluarlugit, aqutsisoq oqarpoq.
