Nunarput Tivolimi: “Ataatsimoorneq pillugu aaqqissuussisarpugut”
Takummaasut, Sauwestarikkut raggaemik nipilersorpalunnerat, kalaallit kulturiat ilisimatusarnerlu pillugit saqqummiinerit, candyfloss, nuannaarniutit, sapangaaqqanik pinnersaasiat, puisit amiinik atisaliat Ole Kristiansen Bandikkullu appisimaarnerat.
Ukiorpassuarni aaqqissuussisoqartarpoq. Kalaallilli kulturiannik ilisimasanik siammarterinissamut suli taama pingaaruteqartigisoq, peqatigiiffimmi Grønland i Tivolimi siulittaasoq, aaqqissuussinermilu siuttuusoq, Kim Falck-Petersen oqarpoq.
- Kulturikkut avitseqatigiittoqarnissaa tunngaviusumik eqqarsaatigisarparput. Kalaallisut tunuliaqutaqartut Danmarkimi innuttaasuusut tusindilikkaajupput, taakkulu Grønland i Tivoli naapiffittut atortarpaat.
- Aamma Grønland i Tivoli kalaallit sulinngiffeqarnerminni angalanissamik pilersaaruteqartut aaqqissuussamut peqataasinnaanissaannut aaqqissuuttarparput. Ataqatigiinneq kalaallillu kulturiat pillugu ilisimasanik siammarterinissaq pillugu aaqqissuussisarpugut, Københavnimi Kalaallit Nunaata Sinniisoqarfiani ulluinnarni sulisartoq, Kim Falck-Petersen oqarpoq.
Ullut marluk annerpaat
Tivolimi katerinnissamut ileqqoq 1976-imi aallartippoq, tassa nunatsinneersut inuusuttut Danmarkimut ilinniariartortut Tivolimi aggustip aallaqqaataani naapinnissaminnik isumaqatigiissimapput.
Ileqqoq taanna ullumikkut ilisimasatsinnut, tassa kalaallit kulturiannik Tivolimi ulluni marlunni malunnartitsisoqartalerluni 2001-imi nutarterneqarpoq.
Ukiut siulii assigalugit inuit tusindilikkaat aggustip aallaqqaataani Tivolimukaapput.
Tivolimmi inuit 10.000-init 15.000-inut ulluni marlunni aaqqissuussinernut ornigunnissaat naatsorsuutigalugu, Tivolimi pisortap, Kasper Schumacherip oqaatigaa.
- Ullut taakku pisoqarfiulluarput. Tamanna ornigarneqarluartarnitta nalinganiinneranik aammali Grønland i Tivolip aaqqissuunneqarneranut peqataaniartoqarneranik pissuteqarpoq. Taamaammat Tivolimi ulluni annerpaat ilagaat, taanna oqarpoq.
Tamatuma saniatigut kulturikkut aaqqissuussineq Tivolimi aamma pingaaruteqarpoq.
- Pingaaruteqarluinnarpoq, pissutigalugu tamanna Tivolimi ilisimaneqarusussusaanik takussusiimmat. Sumiiffik inuit naapiffigisaat nuannaaqatigiiffigisaallu. Taamaammat qilanaaqaagut, Kasper Schumacher oqarpoq.
Kulturikkut assigiinngitsut akornanni suli akornuteqangaatsiartoq
Aaqqissuussisulli aamma pisartumik ineriartortitserusussuseqarput.
Ukioq manna pilersaarutini ilaatigut saqqummiineqassaaq taakkumi siorna immikkut nuannarineqarluarput.
- Pilersaarutit ilaat Kalaallit Nunaanni ilisimatusarnermut kulturimullu tunngasunik sammisaqarnerulersitsinermut allilerniarpagut, Kim Falck-Petersen oqarpoq.
Kalaallit Nunaat Tivolimillu suli annertunerulersinneqarnissaa aamma anguniagaavoq.
Kalaallimmi kulturiannik ilisimasat Danmarkimi siammarternissaat suli pingaaruteqartut, Kim Falck-Petersen isumaqarpoq.
- Kalaallit Nunaata Danmarkillu akornanni kulturikkut assigiinngissutsini suli akornuteqangaatsiartoq takusinnaavara. Taamaammat kulturikkut paasisimasaqassutsip kalaallillu kulturiat pillugu ilisimasat siammarternissaat sulissutiginerat kalaallisut uummateqarlunga tulluusimaarutigaakka, taanna oqarpoq.
