Kalaallit Nunaat Tivolimi pisussat piareertut

Kalaallit Nunaat Tivolimi 42-issaannik aaqqissorneqarpoq, Tivolimut isertut Kalaallit Nunaata kulturiannik takusaqarsinnaallutillu nipilersortunik tusarnaagassaqapput. 

Nipilersortartut assigiinngitsut tusarnaartitsissapput, suliffeqaarfiit nunatsinneersut nittarsaassinissaminnik soqutiginnittorujussuunerat pissutigalugu nerriviit nittarsaassiviit amerlanikuuvagut, aaqqissuussisut tusagassiuutinut nalunaaruteqarlutik taama allapput.  

- Aaqqissuusinerit kikkunnut tamanut soqutiginartussaapput, Kalaallit Nunaata oqaluttuassartaannik ersersitsisussat. Erinarsoqatigiittoqassaaq, nipilersortartut tusaamasat aamma nipilersortartut nutaat tusarnaartitsisapput, aamma ilaqutariinnut meeqqanullu tusarnaartitsisoqassaaq, Kalaallit Nunaat Tivolimi aaqqissuussinermik aqutsisoq Miki Jensen oqarpoq.

AAMMA ATUARUK Tivolimi naapisimaaqatigiinneq kingumut iluatsilluartumik naammassineqarpoq

Nipilersortartut tusaamaneqarlutik tassalu Aalut aamma Nanooq, kiisalu Anda aamma Ib Udlum tusarnaartitsissapput kiisalu angutit erinarsoqatigiit Saqqaarsik Qaqortumeersut tusarnaartitsissallutik. 

Nerriviit tuniniakkanik nittarsaassiviusartut pissanganartunik imaqassapput. 

Nerriviit siornatigut 15-iusarsimasut ukiormanna 23-inut amerlineqarput. 

Atisanik ilulisilersuisartut, suliffeqarfiit Namminersorlutik Oqartussanit pigineqartut  allallu nutaarluinnaat nittarsaassissapput, Miki Jensen qarpoq. 

Suliniaqatigiiffinnut arlalinnut ukiormanna inissaqartitsivugut, taakkua nutaarpassuarnik nuannersunik suliniuteqarput. 

Kissaatigarput Kalaallit Nunaat Tivolimi peqataasut nutaanik isumassarsiorfigissagaat inunnillu nutaanik naapitsiffigalugu, Kalaallit Nunaannimi nutaanik pisoqarpoq isumassarsianillu nutaanik pilersitsiffiuvoq, Miki Jensen oqarpoq.