ASSIT Tivolimi naapisimaaqatigiinneq kingumut iluatsilluartumik naammassineqarpoq
Ullut marluk ingerlanerini inuit 46.000-it Tivolimi najuupput, taakkunanngalu 15.000-it missaat Nunatsinnut attuumassuteqarnissaat nalilerneqarluni.
- Aaqqissuussineq tamaat isigalugu iluarisimaarparput. Eqqissisimasumik nuannersumillu ingerlavoq, tusarnaartitsinerit nuannarineqaqaat, aamma tuniniaaviit tungaannit iluarisimaarinnittoqarneranik apuussivigineqarpugut, GiT-mi suliniuteqarnermi aqutsisoq Miki Jensen taama oqaluttuarpoq nangillunilu:
- Ukiunik 40-nngortorsiorneq danskit tusagassiorfiinit soqutigineqarluarpoq sammineqarlunilu. Suliniaqatigiimmi anguniagaasa pingaarnersaat tassaavoq kalaallit kulturiata ilisimaneqarnerulernissaa.
Aamma atuaruk ASSIT Inuit Tivolimut ussattuarsinnarput
Nalliuttorsiornermi pisorpassuaqarpoq, nipilersortartullu ilisarisimaneqarluartut nutaallu Tivolip silami tusarnaartitsisarfíssuani Plænenimi inuppassuarnut tusarnaartitsipput.
- Erinarsoqatigiit erinarsuutinik nuannarineqarluartunik erinarsorput, Uummannarmiuaqqat pikkorissut tusarnaartitsipput, nipilersoqatigiillu inuusuttut aamma tamanik tupaallatsitsipput. Tusarnaariat aamma pilersaarutaanngitsumik kalattoorratileriasaarput, Da Bartali Crew Nuuk Possemeersoq pulaartoraa, Tivolimilu kalaallit naapisimaaqatigiinnerat naggaserlugu Ole Kristiansen tusarnaartitsivoq. Ullut marluk nuannarluinnartumik ingerlapput, Miki Jensen oqarpoq.
GiT-mi suliniaqatigiit ukiut tamaasa kulturikkut nipilersornikkullu assigiinngiiartunik pisoqartitsinissartik anguniartuarpaat, tamannalumi aamma peqataasunit tusagassiorfinniillu iluarineqarluni arlaleriarluni nersualaarneqartarpoq. Naapisimaaqatigiittarnerli taamatut ingerlanneqartuassappat aningaasaliisartunit aningaasaateqarfinniillu tapersersorluarneqarnissaq pisariaqarpoq.
Aamma atuaruk ASSIT Kalaallit Tivolimi naapisimaartarnerat ullumikkut ukiunik 40-nngortorsiorpoq
- Aaqqissuussineq, Kalaallit Nunaat Tivolimi, Nunatsinnut kulturikkullu suliaqartunut pissarsiffiulluartarpoq. Peqatigiillutami takutitsisussanik nutaanik suliniutinillu nutaanik saqqummiussisarnitsigut kulturikkut pikialaartitsisarnitta nukittuujullunilu imaqarluarnera ukiut tamaasa takutittarparput, tamannalu inuppassuit nuannaarutigisarpaat.
- Aaqqissuussineq taama annertutigisumik ingerlanneqartuassappat aningaasaliisartut aningaasaateqarfiillu takutitsisussat suliniullu Kalaallit Nunaat Tivolimi tapersersortuartariaqarpaat, Miki Jensen taama naggasiivoq.
