Kalaallit Danmarkimiittut meerartaat qinngasaarneqartarneri iliuuseqarfigineqarli
Meeqqat nunatsinnit Danmarkimut nuunnikut naalagaaffeqatigiinnermi akuliunniapiloortarneri ersarittoq nalunaarusiami atuarneqarsinnaavoq.
Taamaammat Danmarkimi meeqqat atuarfiini nunarput pillugu ilinniartitsisoqartarnissaa Danmarkimi meeqqat pillugit siunnersuisoqatigiit 'Børnerådip' siulittaasuata Per Larsenip kaammattuutigaa.
- Kalaallit kalaallillu Danmarkimi atugarisaasa ukkatarineqarnerulernissaat naatsorsuutigaarput., Per Larsen oqarpoq.
AAMMA ATUARUK Kalaallit meerartaat Danmarkimiittut oqimaattorsiortut
Oqartussat iliuuseqarlik
Nalunaarusiaq kommuninut, politikkerinut susassaqartunullu allanut iliuuseqaqqusinermik siunertaqartoq taanna aamma oqarpoq. Meeqqammi Danmarkimi ulluinnaat ajunnginnerulissappat ajornartorsiut iliuuseqarfigineqartariaqarneraramiuk.
AAMMA ATUARUK Kalaallinut isummat pigiliutiinnakkat sorsullugit ataatsimeersuarneq
- Meeqqat kalaallit qingasaarneqartarnatik kiserliornatillu, taakkualu kingunerisinnaasaannik nalaataqarnatik allanik ikinnguteqalerlutik ataatsimoornernut peqataalernissaat inuunerminnilu nuannersumik misigisaqarnissaat uani siunertaavoq.
"Sooruna eqqumeeqaasi?"
Meeqqammi nunarput kalaallillu pillugit isummat pigiliutiinnakkat ulluinnarsiutigaat.
- Sooruna puisitortarpisi, sooruna taama isikkoqartusi, sooruna eqqumeeqaasi? Kalaallillu Nunaat pillugu soqutiginnilillatuaraangamik ajortumik aallaaveqarajuttarpoq, Børnerådep misissuinerani meeqqat apersorneqartut ilaat Aviaja oqaluttuarpoq.
AAMMA ATUARUK Kalaallit pillugit isummat pigiliutiinnakkat festivalimi akiorniarneqartut
Kalaallit pillugit isummat pigiliutiinnakkat ingalassimaarneqassappata danskit angajoqqaat aamma akisussaaffeqartut Børnerådip siulittaasua oqarpoq. Allanngortitsissagaannilu angerlarsimaffimmi iliuuseqarneq siulleq pissanerarlugu.
- Kalaallit pillugit ajortumik sunniuteqarsinnaasumik oqalunneq pinngitsoortinniarneqassaaq, tassami tamanna meeqqanut siaruarsinnaavoq. Taamaalilluni kalaallit meerartaasa ataatsimoornerniit peqataatinneqarunnaarnerat, qinngasaarneqartarneralluunniit ajornartorsiutinngussaaq, Per Larsen oqarpoq.