Politiit ullormut nalunaarutaat: Peqquserlunneq, politiinut sioorasaarineq angerlarsimaffimmilu eqqissiviilliornerit
Inoqatinut attaveqatigiittarfikkut facebookikkut peqquserluttoqarsimaneranik Kalaallit Nunaanni Politiit ippassaq tallimanngornermi ulloqeqqanut tanneq sisamat nalunaarfigineqarput.
Tassani qilalukkap qernertap tuuaava 4500 koruunilerlugu tunineqarpoq, tamatuma kingorna tuniniaasup facebookikkut quppernini peerpaa.
Tamanna pillugu pinerluttulerinermut inatsimmik unioqqutitsinertut suliaq aallartinneqartoq.
Kalaallit Nunaanni Politiit KNR-imut ilisimatitsipput.
Innuttaasullu peqquserluffigineqarnissartik pinaveersaartissagunikku eqqarsarluaqqaarlutik pisisarnissaat kajumissaarutigalugu sillimasut pisortaata Aputsiaq Hansenip oqaatigaa:
- Taamatut kingunilimmik nalaataqarusunngikkaanni sissuernerunissaq eqqumaffiginninnissarlu kajumissaarutigaarput, Aputsiaq Hansen oqarpoq.
Politiit sioorasaarneqartut
Arfininngornerulli unnuaa politiinut ulapaarfiuvoq.
Kalaallit Nunaannimi Politiit angerlarsimaffimmi eqqissiviilliortitsisoqarnera pissutigalugu angerlarsimaffinnut arlalinnut ornigutsinneqarput.
Politiillu angerlarsimaffimmi eqqissiviilliortitsisoqarnerani pasineqartumik tigusarinnereernermi kingorna toqunneqarnissaminnik sioorasaarneqarput.
- Pasineqartoq tigusarineqareernermi kingorna politiinut tigusarinnittunut toqutsinissaminik sioorasaarivoq. Taamaammat suliaq aallartinneqarpoq eqqartuussivimmilu suliarineqarnissaa naatsorsuutigineqarluni, sillimasut pisortaat oqarpoq.
Angerlarsimaffimmi eqqissiviilliornerit meerartallit arlaqartut
Kalaallit Nunaanni Politiit angerlarsimaffimmi eqqissiviilliortoqarneranik nalunaarutiginnittoqarnera pissutigalugu ullaakkut arfineq pingasunut tanneq tallimanngortoq aamma ornigutsinneqarput.
Tassani meeqqat pingasut angerlarsimaffimmi imigassatorfiusimasumi naammattoorneqarput.
- Ataasiinnaanngilaq, arlaqarput ornitagut meerartallit, sillimasut pisortaat Aputsiaq Hansen oqarpoq.
Angerlarsimaffimmi eqqissiviilliorfiusumi meerartalinnik naammattuuigaangamik isumaginninnermi pigaartumik suleqateqartarlutik.
Kalaallit Nunaanni Politiit KNR-imut ilisimatitsissutigaat.
